Փաստ ինֆո

Այն պահին, երբ Նիկոլ Փաշինյանը Սյունիքում է, Էրդողանն ու Ալիևը ուղևորվում են Շուշի. Այս մասին լրագրողների հետ զրույցում հիշեցրեց «Պատիվ ունեմ» դաշինքի ներկայացուցիչ, ՀՀ պաշտպանության նախկին փոխնախարար Արտակ Զաքարյանը:

«Քարոզարշավի այս օրը, երբ կապիտուլյանտը տարբեր կապիկություններ անելով քարոզչական շքախմբերով, ծափ տվողներով Սյունիքում է, նույն պահին արևելքից դեպի հայոց պատմական Շուշի իրենց «հաղթարշավն» են իրականացնում մեր կապիտուլյանտի բարեկամները՝ Էրդողանի և Ալիևի տեսքով։ Այսօր Շուշիում արձանագրելու են իրենց «հաղթանակը»»։

Զաքարյանը նշեց, որ երկրում ստեղծված ճահիճից դուրս գալու մի շարք ելքեր կան, դաշտում որոշ քաղաքական ուժեր շարունակ մատնանշում են դրանց անհրաժեշտությունը։

Անդրադառնալով ՀՀ երրորդ նախագահի հրապարակած ձայնագրությանը, Զաքարյանը նշեց, որ դրանով պարզ է դարձել, թե ինչպես է Փաշինյանը հսկայական բանակցային ժառանգությունը ձախողել, դիտավորությամբ բերել պատերազմ, կառուցողական դիրքերը վերածել ապակառուցողական դիրքերից բանակցող Հայաստանի։

Զաքարյանը նկատեց՝ մարդիկ արդեն առարկայական են մտածում, դուրս են գալիս էյֆորիկ դաշտերից։

ՀՀ պաշտպանության նախկին փոխնախարարը՝ անդրադառնալով Փաշինյանի մեղադրանքներին, թե նախկինում այնքան վատ էր վիճակը, որ ինքը ստիպված է գնացել պատերազմի, հիշեցրեց, որ Ալիևը 2018-ին հայտնել էր, որ կան միջազգային ճնշումներ, ուստի ինքը գիտակցում էր, որ Արցախը երբեք չի կարող լինել Ադրբեջանի կազմում։

««Պատիվ ունեմ» դաշինքի վարչապետի թեկնածու Արթուր Վանեցյանը քարոզարշավը սկսեց Արցախից, սակայն Փաշինյանը նման մտադրություն չունի, որովհետև շատ լավ հասկանում է, թե ինչ է իրեն այնտեղ սպասվում»։

Զաքարյանը նշեց, որ շատ արագ կարողանալու են ոտքի կանգնեցնել ՀՀ-ի արտաքին գործընկերությունը, դրանով մի շարք ոլորտների զարգացման համար հիմքեր են դնելու։

«Կապիտուլյանտը իրավունք ունի՞ խոսել արտաքին քաղաքականությունից։ 15 օր է չկա ԱԳՆ։ Սա չտեսնված, չլսված խայտառակություն է։ Մեկ ամիս է ադրբեջանցի 1000 զինյալ գտնվում է ՀՀ ինքնիշխան տարածքում։ Մայիսի 12-ից առ այսօր ՀՀ սուվերեն տարածքում վխտում են ադրբեջանցիները, իսկ կապիտուլյանտը բուտերբրոդներ բաժանելով 2000 մարդ վերցրած ՀՀ–ով մեկ կապիկություններ անելով հիմա էլ հայտնվել է Սյունիքում։ Ի՞նչի համար է հայտնվել, ո՞ւմից է ինչ է ուզում»։

Զաքարյանը նշեց՝ հայի պատիվ ու արժանապատվությունը վերադարձնելու են։

«Գուցե շատերն այսօր աշխատավարձի համար են ընկած կապիտուլյանտի հետեվից այս կողմ, այն կողմ գնում, ծափ տալիս, ամաչելով, երեսները թաքցնելով, բայց միևնույնն է, պատիվ ունեցող մարդիկ են»։

Աղբյուր` Փաստինֆո