Փաստ ինֆո

Ակնայի այդ քարտեզները ոչ միայն ականապատման քարտեզներ են, այլ առաջին հերթին ադրբեջանական զինուժի, զինտեխնիկայի կանխարգելման միջոց։ «Փաստինֆո»-ի հետ զրույցի ժամանակ ասաց անվտանգային հարցերով փորձագետ Արմեն Մանվելյանը։

Նրա դիտարկմամբ՝ քանի դեռ այդ տարածքներն ականապատված են, Ադրբեջանը չի կարող զրահատեխնիկա կամ զորախումբ մոտեցնել Արցախի բնակավայրերին, հետևաբար այդ ուղղությամբ լայնածավալ ռազմական գործողություններ չեն կարող իրականացնել։ Մինչդեռ այդ քարտեզների հանձնումը մեր անվտանգությունը դարձնում է ավելի խոցելի։

«Սա ամբողջ Արցախի համար վտանգ է ներկայացնում, քանի որ եթե նախկինում կենտրոնական ուղղությամբ չէին կարող հարվածել, ապա այսօր այդ ուղղությունը դառնում է բաց և խոցելի։ Եթե այդ գնով պետք է գերիներ հետ բերվեին, ապա այդ քարտեզը շատ ավելին արժեր, քան 15 ռազմագերիներ, 100-ից ավել ռազմագերի կարող էին բերել։ Առանց այդ քարտեզի այդ շրջանի ականազերծումը շատ երկար կտևեր, խոսքը ոչ թե 1, 2 կամ նույնիսկ 10-15 տարվա մասին է, այլ ավելի երկար ժամանակահատվածի։ Նույնիսկ մարդկային մեծ կորուստներ կպահանջվեր, որ կարողանային ականազերծել»,-նշեց Արմեն Մանվելյանը։

Դիտարկմանը, որ ՀՀ վարչապետի պաշտոնակատար Նիկոլ Փաշինյանը հայտարարում է, որ ուրիշ քարտեզներ էլ կան, արդյոք պատրաստվում է դրանք նույնպես փոխանակել, Արմեն Մանվելյանը նշեց՝ այս իրադարձությունը ցույց տվեց, որ այդ տղաները պատանդ են ոչ միայն Ադրբեջանի ձեռքում, այլ նաև Նիկոլի ձեռքում։

«Եթե քարտեզներ գերիների դիմաց օպերացիա են կազմակերպում, ուրեմն դա կարող էին 6 ամիս առաջ անել, այլ ոչ թե տղաներին այդքան ժամանակ պահեին գերության մեջ, հետո նոր փոխանակում անեին։ Փաստորեն տղաներին պահել է գերության մեջ և փոխանակում արել այն պահին, երբ նրան անհրաժեշտ է եղել իր ցածր ռեյթինգը մի փոքր բարձրացնել»,-ասաց փորձագետը։

Վերջինս ընդգծեց՝ եթե այդ քարտեզները տալիս ենք, և Ադրբեջանն էլ իր ռազմատեխնիկան մտցնում է տարածքներին, Հայաստանի սահմանին, պատերազմի հավանականությունը կտրուկ աճում է. «Այս պայմաններում պետք է շատ ավելի խելամիտ գտնվենք։ Բանակցությունները պետք է վարի մի մարդ, ով պաշտպանում է Հայաստանի շահերը, այլ ոչ թե իր և իր ընտանիքի շահերով է շարժվում։

Հարցը պետք է վերադարձնել մարդասիրական տիրույթ, որովհետև կա փաստաթուղթ, որում ասված է, որ մարդիկ անկախ իրենց կարգավիճակից պետք է փոխանակվեն։ Ստացվում է՝ Հայաստանը բոլոր կետերը կատարել է, մի բան էլ ավել, իսկ Ադրբեջանը ոչ մի բան չի արել»,-նշեց Արմեն Մանվելյանը։

Աղբյուր` Փաստինֆո