Փաստ ինֆո

Այսօր մեզ մոտ այնպիսի զգացողություն է, որ նվաստացումը չի կարող առավել լինել,- «Փաստինֆո»-ի հետ զրույցում նշել է «Արդարություն» կուսակցության պատգամավոր Մետաքսե Հակոբյանը՝ մեկնաբանելով Թուրքիայի նախագահ Ռեջեփ Էրդողանի այցը Շուշի:

Պատգամավորը պատմեց, որ զրուցել է մի բնակչի հետ, որը ապրում է այն հատվածում, որից երևում է Շուշի տանող ճանապարհը եւ վերջինս ականատես է եղել, որ նախօրեին ամբողջ օրը այդ հատվածում շատ ակտիվ տեխնիկա է աշխատել, տարվել են ակտիվ նախապատրաստական աշխատանքներ:

«Ամբողջ գիշեր հնչել են կրակոցներ և մուղամի ձայներ, որոնք հասել են Ստեփանակերտ: Այսինքն՝ ադրբեջանցիները նախատոնական տրամադրությամբ սպասում էն Թուրքիայի և Ադրբեջանի նախագահների այցին», - նկատեց պատգամավորը:

Նա շեշտեց, որ մեկ տարի առաջ ոչ մեկի մտքով անգամ չէր կարող անցնել, որ մենք տեսնելու ենք Շուշիում Թուրքիայի և Ադրբեջանի դրոշները և այնտեղ այցելելու են Թուրքիայի և Ադրբեջանի նախագահները:

«Իրավիճակը սարսափելի է, քանի որ այլևս չես կարող առանձնացնել Թուրքիայի, Ադրբեջանի, Հայաստանի և Արցախի իշխանություններին:

Նրանք կարծես մեկ են դարձել, և վիշապի կերպարով հոշոտում են մեր ազգին, որը դարերի միջով է անցել», - նկատեց պատգամավորը:
Հակոբյանի խոսքերով՝ թշնամու ղեկավարության երթուղու մասին ստիպված իմանում ադրբեջանական մամուլից, քանի որ մեր լրատվական դաշտը շատ ակտիվ լուսաբանում է Նիկոլ Փաշինյանի քարոզարշավը:

«Փաշինյանը շարունակում է պարել և բարձր տրամադրությամբ խոստումներ տալ: Այսօր թշնամին օկուպացված Շուշիում է, իսկ Փաշինյանը Սյունիքում, սա պատահականություն չէ: Մի տարի առաջ Փաշինյանը իր կնոջ հետ պարում էր Արցախում, իսկ հետո հանձնեց Արցախը:

Նույնը նա անում է այսօր Սյունիքում, պարում է ու կեղծ խոստումներ է տալիս: Ցավով մենք գիտակցում ենք, որ հերթը Սյունիքինն է, և դա կարող է արվել շատ կարճ ժամանակում: Ուղղակի մենք հույս ունենք, որ ընտրությունների արդյունքում իշխանությունը փոխվելու է և մենք կարողանալու ենք ոտքի կանգնել: Իսկ հետո, կխոսենք նաև մեր կորուստները վերադարձնելու մասին»,- շեշտել է Հակոբյանը:

Հեղինակ՝ Անի Մշեցյան

Աղբյուր` Փաստինֆո