Փաստ ինֆո

Նիկոլ Փաշինյանն արել է ամեն ինչ, որպեսզի արժեզրկի հայ ազգի տասնամյակներով ստեղծված բարիքները: Այս մասին Ջերմուկում ֆեյսբուքի ուղիղ եթերի ժամանակ ասել է ՍԴ աշխատակազմի նախկին ղեկավար Էդգար Ղազարյանը՝ «Զրո ձայն թշնամուն» նախաձեռնության շրջանակներում:

Ղազարյանը նկատեց, որ Նիկոլ Փաշինյանը ոչինչ չի արել Ջերմուկ քաղաքի համար: Սակայն, Ռոբերտ Քոչարյանի պաշտոնավարման ընթացքում, Ջերմուկում մի շարք բարեփոխումներ են իրականացվել: Օրինակ վերանորոգվել է Կեչուտի ջրամբարից Ջերմուկ տանող ավտոճանապարհը:

«Ռոբերտ Քոչարյանի պաշտոնավարման ժամանակ վերանորոգվել է Ջերմուկ տանող միջպետական ճանապարհը: Նաև ՀՀԿ-ի ժամանակ վերանորոգվել է Ջերմուկի երկու մասերը իրար կապող կամուրջը, այն վերանորոգվել է երկու անգամ` մեկ անգամ Ռոբերտ Քոչարյանի պաշտոնավարման ժամանակ, մեկ անգամ Սերժ Սարգսյանի պաշտոնավարման ժամանակ: Նաև քաղաքում վերանորոգվել են մի շարք առողջարանները: Իսկ Ջերմուկի հանքային ջրի գործարանը Անդրկովկասի լավագույն գործարաններից մեկն է»,- ընդգծեց նա:

ՍԴ աշխատակազմի նախկին ղեկավարի կարծիքով՝ նախկին իշխանությունների ժամանակ քաղաքում և Հայաստանում մի շարք բարեփոխումներ են իրականացրել, իսկ երբ իշխանության եկավ Փաշինյանը իրավիճակը կտրուկ վատացել է:

Ըստ Ղազարյանի, Սերժ Սարգսյանի ու Ռոբերտ Քոչարյանի ժամանակ շատացել են Հայաստանում զբոսաշրջիկների հոսքը, կառուցվել են նոր հյուրանոցներ:

«Փաշինյանն այժմ վարկաբեկում է մեր եկեղեցին, մեր իրավաբաններին, գործարարներին: Ըստ նրա բոլորը գող են և թալանչի, բայց այնքան վնաս, որքան որ Փաշինյանն է տվել մեր երկրին, ոչ ոք չի տվել: Մի լսեք Փաշինյանին, նա մեր երկրի ամենամեծ թշնամին է, պետք է նրանից ազատվել, որպեսզի ապրենք նորմալ և հանգիստ կյանքով: Մենք ունենք պատմական հնարավորություն ազատվելու այն դժոխքից, որի մեջ հայտնվել ենք: Մեր երկիրը չի թալանվել, բոլոր միջոցները ներդրվել են անվտանգության և մեր երկրի բարելավման մեջ, այդ պատճառով մենք պատերազմ չենք ունեցել: Պատերազմը բերել է Փաշինյանը և չի կարողացել այն կառավարել»,-եզրափակեց Ղազարյանը:

Աղբյուր` Փաստինֆո