Փաստ ինֆո

Ատելության խոսքի չափաքանակը գնալով մեծանում է։ Նիկոլ Փաշինյանը կարողացել է իրեն սատարող զանգվածին պատրաստել մեծ բախումների՝ ընտրություններից առաջ։ Այս մասին հրավիրված մամուլի ասուլիսին ասաց Ընտրությունների վերահսկման կոմիտեի անդամ Նարեկ Սամսոնյանը։ 

Սամսոնյանն արձանագրեց, որ Նիկոլ Փաշինյանի կողմից քաղաքապետարանում արդեն դիմում է ներկայացվել՝ հունիսի 21-24-ն ընկած ժամանակահատվածում պերմանենտ հանրահավաքներ իրականացնելու մասին, մինչդեռ՝ հասկանալի չէ, թե հաղթող թեկնածուն ինչ կարիք ունի հետընտրական 4 օր անընդմեջ հանրահավաքներ իրականացնելու։ Սամսոնյանի գնահատմամբ՝ դա կասկածի տակ է դնում հաղթող թեկնածու լինելու իր հրապարակային կոչերը և ավելի է ամրապնդում այն հանգամանքը, որ ատելության խոսքի այդ մեծ քարոզով Նիկոլ Փաշինյանը պատրաստվում է իշխանությունը զավթելու փորձ անել։ Սամսոնյանի խոսքով՝ վերջին շրջանում իրականացված հարցումները ցույց են տալիս, որ Փաշինյանն այլևս պարտվող թեկնածու է, բոլոր հարցումներով զիջում է «Հայաստան» դաշինքին։

Ավելին՝ Սամսոնյանը հայտնեց, որ իշխանությունների կողմից ձեռք է բերվել շուրջ 200 բարձրախոսներ, որոնք տեղում փոքր հանրահավաք անելու համար են։

«Այսինքն՝ բախումները, որոնք նա պլանավորում է, ըստ էության, պետք է լինեն քաղաքի տարբեր մասերում և պետք է լինի 100-ից ավել մարդ, որ պետք է այդ բարձրախոսներով համակարգեն ինչ-ինչ գործողություններ»,- նշեց Սամսոնյանը։

Իսկ ամենամտահոգիչը տեղեկատվությունն այն է, որ վերջին մեկ ամսվա ընթացքում բավականին մեծ քանակի զենքով պարգևատրված մարդիկ կան, խոսքը մոտ մի քանի հարյուր զենքի մասին է։

«Թող ոստիկանապետն իր ականջին օղ անի, որ, եթե հանկարծ պարզվի, որ այս տեղեկատվությունը թեկուզ 10 տոկոսով համապատասխանում է իրականությանը՝ անձամբ պատասխանատվության է ենթարկվելու նրա համար, որ լավ իմանալով ինչու են իրեն հրահանգել խարգևատրել տարբեր մարդկանց զենքերով, պարգևատրել է»,- նշեց Սամսոնյանը՝ հավելելով, որ այս տեղեկատվությունը հրապարակում են՝ վտանգը կանխելու համար։ Բացի դա՝ Ոստիկանության կողմից մի քանի տասնյակ անձանց նաև թույլտվություն է շնորհվել՝ ողորկափող հրացաններ ստանալու համար։

Մանրամասները՝ տեսանյութում

Աղբյուր` Փաստինֆո