Փաստ ինֆո

Նախ պետք է ապահովել երկրի անվտանգությունը, հետո խոսել կոմունիկացիաների մասին։ «Փաստինֆո»-ի հետ զրույցի ժամանակ ասաց անիմատոր, «Հայաստան» դաշինքի պատգամավորի թեկնածու Դավիթ Սահակյանցը։

«Եթե չունենանք ապահով սահմաններ, կոմունիկացիաների բացումը կդառնա մեր վախճանը։ Դրա համար առաջնահերթ պետք է սահմաններն ամրապնդել, ինչից հետո մտածել, խոսել այլ տարբերակների մասին»,-նշեց Դավիթ Սահակյանցը։
Վերջինս համոզված է, որ գործող իշխանություններին չի հաջողվի ընտրությունների միջոցով վերարտադրվել։ Նրա կարծիքով սա նրանց վախճանն է։

Անդրադառնալով 15 գերիների վերադարձին՝ Դավիթ Սահակյանցը նկատեց, որ դրա դիմաց տվեցինք ականապատված տարածքների քարտեզ, մինչդեռ ճիշտ և գրագետ աշխատանքի դեպքում հնարավորություն կունենայինք այդ քարտեզի փոխարեն ստանալ բոլոր գերիներին։

«Ուրախ եմ, որ այդ տղաները վերադարձել են։ Վերջապես ճրագները վառվեցին այդ տներում և 15 ընտանիք երջանկացավ, բայց կարծում եմ՝ կարելի էր շատ ավելի մեծ բաների հասնել՝ ունենալով նման խաղաքարտ։ Գիտակից մարդիկ շատ են և հասկանում են՝ ինչի համար դա արվեց, ինչու հենց այս էտապում դա արվեց։ 7-8 ամիս ժամանակ են ունեցել, չեն կարողացել այդ հարցը լուծել, չգիտես ինչու ստացվեց հենց ընտրություններից մեկ շաբաթ առաջ»,-ասաց Դավիթ Սահակյանցը։

Ինչ վերաբերում է հնարավոր քաղաքացիական բախումներին, Դավիթ Սահակյանցը նկատեց՝ Նիկոլ Փաշինյանը չի կշտանում արյունից. «Կա մտավախություն, որ կարող են լինել բախումներ և դրանց ուղիղ պատասխանատուն լինելու է հենց Նիկոլ Փաշինյանը, ինչպես 2008 թվականին»,-ասաց Դավիթ Սահակյանցը։

Մանրամասները՝ տեսանյութում

Աղբյուր` Փաստինֆո