Փաստ ինֆո

Այսօր Հայաստանն ավերակների են վերածում այս կառավարությունը, այսօրվա իշխող քաղաքական թիմը։ Մենք գալիս ենք իշխանության՝ վերականգնելու երկրի անվտանգությունը, պաշտպանելու երկրի սահմանները, ապահովելու տնտեսական վերելք ՀՀ-ի համար, կանխելու արտագաղթը և ապահովելու բոլորին՝ բարեկեցիկ կյանքով։ Այս մասին Սպիտակ քաղաքում «Հայաստան» դաշինքի նախընտրական քարոզարշավի ընթացքում ասել է դաշինքի վարչապետի թեկնածու, ՀՀ երկրորդ նախագահ Ռոբերտ Քոչարյանը։ 

«Մենք մեզ հետ բերելու ենք հանգստություն, որովհետև չի կարող բևեռացված, իրար նկատմամբ թշնամացած հասարակությունը կառուցողական լինել։ Հնարավոր չէ ոչինչ անել, եթե մի բռունցքի պես չմիանանք և մեր առջև չդնենք նպատակ՝ ունենալ բարեկեցիկ, զարգացող, ուժեղ Հայաստան»,- նշեց Ռոբերտ Քոչարյանը։

Անդրադառնալով Սպիտակ քաղաքում տիրող իրավիճակին և իր կառավարման տարիներին քաղաքի վերականգմանը՝ Ռոբերտ Քոչարյանը նշեց, որ իր հիշողությունը լավն է, հիշում է յուրաքանչյուր շենք՝ Սպիտակում, նույնիսկ հիշում է շինարարների դեմքերը, իսկ աշխատանքների ծավալներն ավելացնելու դրդիչ ուժն իր համար եղել է այն միտքը, թե հաջորդ անգամ գալու դեպքում, ինչպե՞ս պետք է լինի մարդկանց աչքերը։

«Եթե հարցնեն՝ դու ղեկավար ես, դու ի՞նչ ես արել մեր համար, ի՞նչ եմ ասելու։ Ինձ համար նամուսի, թասիբի հարց էր։ Այն ժամանակ երկրում գումարները շատ ավելի քիչ էին, բայց աշխատողի վրա միշտ փող էր գալիս, միշտ հնարավորություն էր բացվում և այդպես էլ եղավ։ Մեր աշխատանքն ուղղակի խրախուսեց բազմաթիվ մարդկանց՝ և Սփյուռքում, և՛ օտարերկրացիներին, կառուցեցինք նոր թաղամասեր, մշակույթի տներ, վերականգնեցինք։ Հիմա ինձ մոտ հարց է առաջանում՝ եթե երեք տարի Սպիտակ քաղաքում ոչինչ չի արվել կառավարության կողմից, ի՞նչ երեսով են իրենք գալիս ձեր մոտ, կազմակերպում հանրահավաք, դիմում ձեզ՝ ձեր վստահության քվեն ստանալու համար։ Մեկը կարո՞ղ է բացատրել, թե ինչ խղճով։ Բա դուք պատրա՞ստ եք ձայն տալ այդ մարդկանց»,- նշեց Ռոբերտ Քոչարյանը՝ հավելելով, որ հունիսի 20-ից հետո քաղաքացիները տեսնելու են մի կառավարություն, որի համար նամուսի, թասիբի հարց է լինելու՝ ամեն անգամ այստեղ գալուց պարզերես նայել մարդկանց աչքերին և ասել ինչ է արվել։

Աղբյուր` Փաստինֆո