Փաստ ինֆո

«Մի քանի օր առաջ ևս փորձ էր արվել սարքել մեկ այլ քրեական գործ Ռուբեն Խլղաթյանի վրա»,- այս մասին Արմավիրի նախկին քաղաքապետ Ռուբեն Խլղաթյանի գործով հրատապ մամուլի ասուլիսի ժամանակ հայտնեց «Պատիվ ունեմ» դաշինքի ներկայացուցիչ Արսեն Բաբայանը՝ հավելելով, որ առաջին դեպքը չէ, երբ փորձում են կասեցնել Խլղաթյանի գործունեությունը «Պատիվ ունեմ» դաշինքի շրջանակներում, մասնավորապես՝ նրա հեղինակության, քաղաքական պայքարի մեջ։ Բաբայանը տեղեկացրեց, որ նախկին փորձը չի ստացվել, սա էլ չի ստացվելու։

Բաբայանը հավելեց, որ «Պատիվ ունեմ» դաշինքի շուրջ քաղաքական հետապնդումները սկսվել են հինգից վեց օր առաջ։ Այն պահից, երբ կապիտուլյանտը տեսնում է, որ դաշինքի հեղինակությունը էապես աճում է, սկսում է քաղաքական ռեպրեսիաները։

«Օրինակ՝ 2020 թվականի նոյեմբերի 11-ի հարուցված գործով՝ հանրահավաք կազմակերպելու մասով, սկսել են մեր ակտիվ կուսակցական ընկերներին կանչել հարցաքննությունների։ Արգելանքներ են դրել կուսակցական ընկերների հաշիվների վրա՝ այդ նույն օրվա հանրահավաքին մասնակցելու համար՝ առանց ծանուցման։ Օրինակ իմ երեք հաշիվներից ամեն մեկի վրա դրված է արգելանք 400 հազարական դրամ։ Ծանուցումներ չեմ ստացել։ Բանկային հաշիվները դրել են արգելանքի տակ և հիմա, երբ ուզում ենք դատարանով հասնենք մեր նպատակին՝ բացվեն հաշիվները, կարող է մեկ, մեկ ու կես տարի դա տևի»։

Հիշեցնենք, որ նախօրեին ձերբակալվել է «Պատիվ ունեմ» դաշինքի պատգամավորության թեկնածու Ռուբեն Խլղաթյանը:

Աղբյուր` Փաստինֆո