Փաստ ինֆո

Այս իշխանություններն ի վիճակի չեն լուծելու այն խնդիրները, որոնք ծանրացած են Հայաստանի առջև, այս մասին ԲՀԿ առաջինն է ասել: Հրավիրված ասուլիսի ժամանակ ասաց ԲՀԿ խմբակցության քարտուղար Արման Աբովյանը:

Նա նկատեց, որ դեռևս 2020թ-ի հունիսի 5-ին, ԲՀԿ ղեկավար Գագիկ Ծառուկյանը հստակ նշել է  այն բոլոր խնդիրները, որոնք տեղի էին ունենում և, որոնք  պետք է տեղի ունենային: Ծառուկյանը զգուշացրել էր, որ մենք կանգնած ենք լայնածավալ պատերազմի և տնտեսական ճգնաժամի առջև։ Ըստ Աբովյանի՝ այդ հայտարարությունը հենված էր տարբեր վերլուծական տվյալների վրա։ 

«Իսկ ինչ արեց իշխանությունը: Եթե իրենք հրաժարվում էին առերեսվել իրականության հետ, ապա գոնե լսեին մեզ, սակայն, տեղի ունեցան քաղաքական հետապնդումներ, ընդհուպ մինչև Ծառուկյանին բանտարկելը: Ծառուկյանն այդ ժամանակ ասաց, որ եթե իրեն բանտարկելով կլուծվի արցախյան հարցը, նա իր բանտարկմանը դեմ չէ, իսկ մի քանի օր հետո պատերազմը սկսվեց»,- ասաց պատգամավորը:

Արման Աբովյանը նկատեց, որ Ադրբեջանը, որը պատերազմի ժամանակ օգտագործում էր տերորիստներ Սիրիայից, Պակիստանից,  պատերազմի ժամանակ ցույց տվեց ամենաանմարդկային դրսևորումները, այսօր մեղադրում է մեր գերիներին տերորիզմի մեջ։ Սկսվել են դատական գործընթացներ, իսկ ներկա իշխանությունները, Աբովյանի համոզմամբ՝ զարմանալիորեն գերիների հարցով չեն զբաղվում կամ անընդհատ այդ հրատապ հարցի լուծումը ձգձգում են։ 

«Ամեն պահը գերության մեջ դժոխք է: Հասկանալի է, որ գոյություն ունի միջազգային ճնշում, և Ադրբեջանը փորձում է քողարկել իր անասնական պահվածքը իբր տերորիստների դեմ պայքարելով»,-ասաց նա՝ հավելելով, որ ՀՀ-ն պետք է կոշտ արձագանքի այս իրավիճակին,  բայց այսօր մեր ԱԳՆ-ն գլխատված է: 

«Թշնամին գտնվում է ՀՀ տարածքում, պատերազմը չի ավարտվել: Մենք չպետք է մոռանանք, որ մեր տղաները գերության մեջ են, մինչև հիմա էլ գերեվարվում են մեր զինվորները։  Այսօրվա իշխանություններն ի զորու չեն ապահովել ՀՀ քաղաքացիների անվտանգությունը: Ադրբեջանը օկուպացրել է Արցախի 75% և այժմ փորձում է լեգիտիմացնել իր օկուպացիան»,-նշեց Աբովյանն ու իրավիճակից դուրս գալու  ելք առաջարկեց. «Անվտանգության խնդիրները լուծելու համար մեզ անհրաժեշտ է դուրս գալ Ռուսաստանի Դաշնության հետ ավելի խորը հարաբերությունների ֆորմատ, ստորագրել նոր ռազմաքաղաքական փաստաթուղթ, որը համահունչ կլինի այս իրավիճակին, ինչպես նաև ամենակարևոր խնդիրն այսօր հայկական  բանակի  շուտափույթ վերականգնումն ու արդիականացումն է»։

Աղբյուր` Փաստինֆո