Փաստ ինֆո

Արմավիրի նախկին քաղաքապետ, «Պատիվ ունեմ» դաշինքի պատգամավորի թեկնածու Ռուբեն Խլղաթյանի վերաբերյալ քրեական գործը Քննչական կոմիտեի վարույթից փոխանցվել է ՀՔԾ՝ քրեական գործով նախաքննություն իրականանցնելու նպատակով։ ՀՔԾ-ից «Փաստինֆո»-ին հայտնեցին, որ ստացել են քրեական գործը։

Ինչպես արդեն տեղեկացրել ենք՝ 9 մլն դրամի չափով առերևույթ ընտրակաշառք բաժանելու դեպքի առթիվ հարուցվել է քրեական գործ ՀՀ քրեական օրենսգրքի 34-154.2-րդ հոդվածի 2-րդ մասի հատկանշներով, որի շրջանակներում ձերբակալվել է Արմավիրի նախկին քաղաքապետ, «Պատիվ ունեմ» դաշինքի պատգամավորի թեկնածու Ռուբեն Խլղաթյանը և Գ. Պ.-ն։ Ըստ դատախազության տարածած պաշտոնական հաղորդագրության՝ ՀՀ ոստիկանության ծառայողների կողմից ձեռնարկված համատեղ միջոցառումների արդյունքում 2021թ. հունիսի 10-ին, ժամը 16։30-ին, Ջանֆիդա գյուղում գտնվող Գ. Պ.-ի տանը վերոնշյալ երկու անձինք բռնվել են 9.000.000 ՀՀ դրամ ընտրակաշառքի գումարի փոխանցման պահին։ Ընդ որում՝ ոստիկանության աշխատակիցներին տեսնելուն պես նրանք դուրս՝ դեպի տան բակ են նետել իրենց ձեռքում գտնվող՝ պոլիէթիլենային տոպրակով ընտրակաշառքի առարկա հանդիսացող գումարը, որ հայտնաբերվել և վերցվել է դեպքի վայրի զննությամբ։

Թեև Քրեական դատավարության օրենսգրքի համաձայն՝ սույն քրեական գործով նախաքննությունն ի սկզբանե պետք է իրականացվեր ՀՔԾ-ում, դատախազությունը նախաքննության իրականացումը հանձնարարել էր ՔԿ-ին։ Քննչական ենթակայության խախտման փաստի մասին ահազանգել են նաև փաստաբանները՝ նշելով, որ քրեական գործն ի սկզբանե ապօրինի է։

Այս ահազանգերից հետո քրեական գործը ՔԿ-ի վարույթից փոխանցվել է ՀՔԾ-ին, որտեղ և ի սկզբանե պետք է իրականացվեր նախաքննությունը՝ ըստ ենթակայության։

Աղբյուր` Փաստինֆո