Փաստ ինֆո

Արաբկիրում քարոզարշավ իրականացնելիս ՔՊ-ականների և քաղաքացիների միջև տեղի ունեցած միջադեպի հետեւանքով քաղաքացիներից մի քանիսն են մարմնական վնասվածքներ են ստացել և տեղափոխվել հիվանդանոց։ «Փաստինֆո»-ի հետ զրույցում այս մասին նշել է «Քաղաքացիական պայմանագիր» կուսակցության հանրային կապերի համակարգող, ԱԺ պատգամավոր Վահագն Ալեքսանյանը:

Հիշեցնենք, որ Hraparak.am-ը այսօր գրել էր, թե «Քանաքեռ ՀԷԿ»-ի տարածքում քարոզարշավ իրականացնելիս ՔՊ-ականներին մոտեցել է տարեց տղամարդ և ասել, որ այդ տարածքում ընտրողներ չունեն և թող բուկլետները հավաքեն ու գնան։

Ինչին ի պատասխան՝ ՔՊ-ականները՝ ԲՏԱ նախկին նախարար Հակոբ Արշակյանի գլխավորությամբ, վիրավորել են տարեց մարդուն։ Դեպքին միջամտել են տարածքում ապրող մի քանի երիտասարդներ, և իրենց տարածքում ապրող պապիկի պատիվը պահել, ծեծի են ենթարկել ՔՊ-ականներին։

Hraparak-ի տեղեկություններով՝ Հակոբ Արշակյանը թեթև վնասվածքներ է ստացել, իսկ մյուս ՔՊ-ականները տեղափոխվել են «Իզմիրլյան» բժշկական կենտրոն, նրանցից մեկը կոտրվածքներ էլ ունի։

«Փաստինֆո»-ի հետ զրույցում ՔՊ խոսնակը հաստատեց, որ միջադեպ եղել է ՔՊ-ականների և քաղաքացիների միջև, սակայն ըստ նրա՝ չորս ՔՊ-ականներն են ծեծի ենթարկել 10 երիտասարդի, ինչի արդյունքում երիտասարդներից մի քանիսը տեղափոխվել են հիվանդանոց, իսկ ՔՊ-ականներից որևէ մեկը վնասվածք չի ստացել և հիվանդանոց չի տեղափոխվել.

«Արաբկիրում քարոզարշավ իրականացնելիս Հակոբ Արշակյանի և չորս ՔՊ անդամների վրա 10 հարբած երիտասարդ փորձել են բռնություն գործադրել: ՔՊ-ականները դիմել են ինքնապաշտպանության, սաստել են այդ տասը երիտդասարդին, նրանց հասցրել տարբեր աստիճանի մարմնական վնասվածքներ՝ ինքնապաշտպանության շրջանակներում և այդ երիտասարդներից ոմանք տեղափոխվել են հիվանդանոց, ՔՊ-ականները մարմնական ոչ մի վնասվածք չեն ստացել, որովհետև այդ երիտասարդները շատ հարբած են եղել այդ երիտասարդները, միջադեպից անմիջապես հետո ՔՊ-ականները շարունակել են իրենց քարոզարշավը»,-ասաց Ալեքսանյանը և պնդեց, որ ՔՊ-ականներից ոչ մեկը հիվանդանոցում չէ:

Աղբյուր` Փաստինֆո