Փաստ ինֆո

Թշնամին սպասեց մինչև մայիսի 10-ը, խորհրդարանն արձակվեց և մտավ Հայաստանի տարածք՝ Սյունիքի և Գեղարքունիքի մարզերում: Ռազմագերիների հարցով առաջընթաց չկա, ունենք նոր գերիներ, սահմանին անընդհատ սադրանքներ են: Սահմանային այս լարված վիճակին գումարվում է երկրի ներսում լարված վիճակը, ներքաղաքական կյանքը: Այս մասին Լոռիում քարոզարշավի ժամանակ հայտարարել է «Լուսավոր Հայաստան» խմբակցության ղեկավար Էդմոն Մարուքյանը:

«Մեզ պետք է երկիրը ոտքի կանգնեցնել, իսկ դրա համար անհրաժեշտ է համերաշխությունը և ներքին հաշտությունը վերականգնել: Բոլորն ունեն երկիրը ոտքի կանգնեցնելու ծրագիր, բայց ոչ ոք չի ուզում այդ ծրագիրը միասին անել, բոլորն ուզում են միայն իրենք անել: Այս պառակտությունները, բաժան-բաժան վիճակը որևէ լավ բանի չի բերելու: Ես չգիտեմ՝ Ալիևն ի՞նչ է ուզում այս ընտրություններից, բայց Ալիևն ուզում է, որ հայերն իրար կոկորդ կրծեն, մենք իրար ուտենք, իրենք էլ մեր թուլությունից օգտվեն, որքան ուզեն առաջ գան, ինչ կարողանան, պարտադրեն, ինչ ուզենան՝ ստորագրել տան և իրենց շահերը առաջ բերեն: Սրա համար էլ ԼՀԿ-ն միասնության և համերաշխության կոչ է անում, եթե ժողովուրդը մեզ լիազորություն տա, մենք համախմբելու ենք բոլորին: Ընտրություններին Հայաստանի բոլոր ղեկավարները մասնակցում են, թվում է թե հեշտ է ընտրություն կատարելը՝ ումից գոհ եք, նրան էլ ընտրեք, իսկ մեր առաջարկն է՝ եթե բոլորից դժգոհ եք, ընտրեք մեզ»,-ասաց Մարուքյանը:

Անդրադառնալով ռազմագերիների վերադարձին՝ Մարուքյանը նշեց, որ միջազգային հանրությունը չի օգտագործում ողջ գործիքակազմը այդ ուղղությամբ.

«Արևմտյան երկրները լավ գիտեն, երբ ցանկանում են որևէ իշխանության պատժել, դրա ձևը կա: Ալիևը դիկտատոր է, ագրեսոր երկրի ղեկավար, պետք է կիրառել սանկցիաներ, սառեցնել նրանց միլիոնավոր հաշիվները արևմտյան բանկերում, նրանց մուտքը փակել դեպի արևմտյան երկրներ, տեսնեմ ո՞նց չեն վերադարձնում գերիներին, տեսնեմ ոնց չեն դուրս գալիս Հայաստանի սուվերեն տարածքից»,-ասաց Մարուքյանը և հայտնեց, որ ԱՄՆ պետքարտուղարի տեղակալի պաշտոնակատարին է փոխանցել սանկցիաների ցուցակ, որը պետք է կիրառել Ադրբեջանի քաղաքական ղեկավարության նկատմամբ:

Աղբյուր` Փաստինֆո