Փաստ ինֆո

«Արթուր Վանեցյանը բազմիցս արտահայտել է գաղափարը, որ եթե ինքը լիներ իշխանության, ապա գերիների հարցը կարող էր շուտափույթ լուծել։ Գերիների հարցը ոչ թե անձնական դիվանագիտության մակարդակի խնդիր է, այլ միջպետական հարաբերությունների հարց է». Այս մասին լրագրողների հետ հանդիպմանը հայտնեց «Պատիվ ունեմ» դաշինքի ներկայացուցիչ, «Հայրենիք» կուսակցության խորհրդի անդամ Խաչիկ Գալստյանը՝ անդրադառնալով Արթուր Վանեցյանի հայտարարությանը, որն արել էր մի քանի ամիս առաջ։

Լրագրողի դիտարկմանը, թե Վանեցյանը նշել էր, որ կապեր ունի և կարող է գերիների վերադարձով զբաղվել, Գալստյանը նշեց, որ նույիսկ այդ ժամանակ իշխանությունը գործի կդներ մանիպուլատիվ քարոզչությունը։

«Հաշվի առնելով, որ իշխանությունն այսօր տիրապետում է մանիպուլյացիայի սարսափելի գործիքակազմի, վստահ եմ, որ նույնիսկ եթե անձնական կապերով մի քանի մեր հայրենակիցների վերադարձը ապահովեր, իշխանական քարոզչամեքենան այդ տեղեկությունը գլխիվայր շուռ տալով հանրությանը կասեր՝ «տեսեք, Վանեցյանը Ալիևի հետ գերիների հարցով պայմանավորվել է, հիմա ինքը գերիներին հետ է բերում, որ իշխանության վարկանիշը իջեցնի»»։

Գալստյանը հիշեցրեց, որ Նիկոլ Փաշինյանը նախընտրական քարոզարշավի ժամանակ շահարկել է գերեվարվածների հարցը, հայտարարել, որ պատրաստ է իր որդուն որպես պատանդ ուղարկել Ադրբեջան։

«Դա ուշացած հայտարարություն է և դա էժանագին քարոզչական հնարք է։ Այդպիսի հնարավորություն և պատրաստակամություն ունեցող մարդը հունվարի 11-ին Մոսկվայում բանակցություններից առաջ ստատուսի փոխարեն այդ առաջարկը թող պաշտոնապես հնչեցներ Ալիևի հետ ուղիղ հանդիպման ժամանակ՝ գերիների և տղայի հարցը ժողովուրդը կընդուներ ու կհասկանար»։

Գալստյանը հիշեցրեց, որ Փաշինյանը հայտարարել է, թե հանձնարարել է զբաղվել որդուն գերիների հետ փոխանակման հարցով ու հետաքրքրվեց՝ ո՞ւմ է հարցրել, եթե ԱԳՆ-ն գլխատված է։

Աղբյուր` Փաստինֆո