Փաստ ինֆո

Ընտրակաշառքի գործով ձերբակալված «Բարգավաճ Հայաստան» կուսակցության պատգամավորի թեկնածու Արամայիս Ապրոյանի գտնվում է Ոստիկանության Գավառի բաժանմունքի ՁՊՎ-ում, իսկ փաստաբանների ներգրավման գործընթացում որոշակի խոչընդոտներ կան։ Փաստաբան Էմին Խաչատրյանը «Փաստինֆո»-ի հետ զրույցում ասաց, որ քրեական գործով որպես պաշտպան ներգրավելու համար դիմում ներկայացրել են դեռևս երեկ, սակայն առ այս պահը ներգրավման գործընթաց չի եղել, պատրաստվում են բարձրաձայնել պաշտպանական իրավունքի խախտման վերաբերյալ։

«Դիմումը ներկայացրել ենք երեկ և ներգրավման գործընթացը չի իրականացվում, արհեստականորեն ինչ-ինչ պատճառներով ձգձգվում է։ Եթե մենք այս պահին ներգրավված պաշտպաններ չենք, չունենք ձերբակալման արձանագրությունը կամ որոշումը, հնարավորություն չունենք ձերբակալման իրավաչափության հարցը բարձրացնել։ Ամեն դեպքում, փաստաթղթերը ստանալուց հետո, կարծում եմ բացթողնված ժամկետը հարգելի կհամարվի»,- նշեց փաստաբանը։

Ճշգրտող հարցին՝ արդյո՞ք Արամայիս Ապրոյանի պաշտպանության իրավունքը խախտվել է, արդյո՞ք որևէ փաստաբանական օգնություն չի ցուցաբերվում, Խաչատրյանն արձագանքեց՝ նշելով, որ երեկ ժամը 18։30-ի սահմաններում արդեն իսկ դիմումներ են ներկայացրել ՀՔԾ այն մասին, որ բերման ենթարկված անձանց հարազատները դիմել են իրենց՝ խնդրելով, որ շահերը ներկայացնել, սակայն առ այս պահը ներգրավված չեն։

«Այսօր նոր քննիչը մեզ հետ կապի է դուրս եկել և պայմանավորվում է, որ ներգրավման գործընթացը կազմակերպվի։ Ամեն դեպքում, եթե նույնիսկ կասկածյալը, դիմումի առկայության պայմաններում, հրաժարվում է պաշտպան ունենալուց, օրենսդրությամբ հստակ ամրագրված է, որ այդ հրաժարվելը կամ պաշտպան ունենալու ցանկություն հայտնելու գործընթացը պետք պահպանվի մեր մասնակցությամբ, այսինքն՝ մեր ներկայությամբ։ Եթե անգամ մեզնից հրաժարվում է, պետք է պարտադիր ներկա լինենք այդ գործընթացին, օրենքով հստակ ամրագրված է այդ դրույթը »,- նշեց Խաչատրյանը։

Հիշեցնենք, որ հունիսի 9-ին ՀՀ գլխավոր դատախազությունը հաղորդագրություն տարածեց՝ նշելով, որ նույն օրը ՀՀ ոստիկանության Գեղարքունիքի մարզային վարչության Գավառի բաժնում օպերատիվ տեղեկություններ են ստացվել այն մասին, որ հունիսի 20-ին կայանալիք ԱԺ արտահերթ ընտրություններին մասնակցող կուսակցություններից մեկի ներկայացուցիչների կողմից Գավառի տարածաշրջանի ընտրողներին բնամթերային տեսքով կաշառք է տրվել՝ նշված կուսակցության օգտին կողմ քվեարկելու համար:

«Նյութերի նախապատրաստմամբ փաստական տվյալներ են ձեռք բերվել այն մասին, որ 2021թ. հունիսի 8-ին՝ ժամը 21:20-ի սահմաններում, այդ կուսակցության Գավառի տարածքային գրասենյակի ղեկավար Ա. Ա.-ն ընտրողներին կաշառք տալու համար նույն գրասենյակի քարտուղար Ս. Զ.-ի՝ Գեղարքունիքի մարզի Գավառ քաղաքում գտնվող բնակարան է տեղափոխել շուրջ 80 փաթեթ սննդամթերք՝ հանձնարարելով նրան ըստ ցուցակի բաժանել ընտրողներին:

2021թ. հունիսի 9-ի առավոտից սկսած՝ Ս. Զ.-ն, ըստ ցուցակի, 8 ընտրողների որպես կաշառք տվել է մեկական փաթեթ սննդամթերք՝ յուրաքանչյուրը մոտ 7000 ՀՀ դրամ արժողության՝ կուսակցության օգտին կողմ քվեարկելու համար:

Նկատի ունենալով, որ նախապատրաստված նյութերում առերևույթ առկա են մի խումբ անձանց կողմից նախնական համաձայնությամբ երկու և ավելի ընտրողներին կաշառք տալու և ստանալու հանցագործության հատկանիշներ՝ ՀՀ ոստիկանության Գեղարքունիքի մարզային վարչության Գավառի բաժնում դեպքի առթիվ հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 1-ին մասով և նույն հոդվածի 4-րդ մասի 1-ին և 2-րդ կետերով նախատեսված հանցագործության հատկանիշներով»,- հայտնել են դատախազությունից՝ տեղեկացնելով, որ երկու անձ բերման է ենթարկվել:

Հունիսի 10-ին ՀՀ դատախազությունից «Փաստինֆո»-ի հետ զրույցում հայտնեցին, որ քրեական գործով երկու անձ ձերբակալվել է, սակայն այս պահին արգելանքի տակ գտնվում է մեկ անձ, մյուսն արգելանքից ազատվել է ստորագրություն չհեռանալու մասին խափանման միջոցով, ևս 6 անձի նկատմամբ կիրառվել է նույն խափանման միջոցը։ Այսինքն՝ քրեական գործով կասկածյալներն ութն են։

Հեղինակ՝ Իզաբել Սահակյան

Աղբյուր` Փաստինֆո