Փաստ ինֆո

Ես առաջարկում եմ, որ Լևոն Տեր-Պետրոսյանը, Ռոբերտ Քոչարյանը, Սերժ Սարգսյանը պատասխանեն մի հարցի՝ ե՞րբ Հայաստանին առաջադրվում էր տարածքներ ոչնչի դիմաց բանաձևը, ո՞նց էին պատկերացնում գործողությունների հետագա պլանը: Լևոն Տեր-Պետրոսյանը շարունակում է իր ապոկալիպիտիկ քննադատությունները, բայց չի ասում՝ իր պատկերացումները որո՞նք էին Արցախի հարցի վերաբերյալ: Երբ Հայաստանին ասվում էր, որ 7 շրջանները պետք է տալ և ադրբեջանցիները տեղահանվածի անվան տակ պետք է վերադառնային Ղարաբաղ և Ղարաբաղի կարգավիճակը տեսանելի ապագայում չի ճշգրտելու, ոնց էին պատկերացնում լուծումը: Այս մասին Լոռու մարզում քաղաքացիների հետ հանդիպման ժամանակ ասել է Նիկոլ Փաշինյանը:

Ըստ Փաշինյանի՝ լուծումը պետք է լիներ այն, որ 2018թ-ի դրությամբ, մեր երկիրը դիմակայունության և մարտունակության բարձր մակարդակ պետք է ունենար, դրանով պետք է զուգորդվեր ողջ բանակցային գործընթացը. «Թող ներվի ինձ անհամեստությունս, բայց միայն 2018թ-ից հետո է այդպես եղել: Հիմա արդեն միջազգային կառույցներն են դրա մասին բարձրաձայնում»,-ասաց Փաշինյանը և ավելացրեց,որ բանակցային գործընթացն իրենք զուգորդել են պետական եկամուտների, զինվորականների աշխատավարձի բարձրացմամբ, զինվորականների սննդի հարցը լուծելով.

«Այսօր ասում են՝ սննդի հարց բանակում երբեք չի եղել: Ես վարչապետ դառնալուց հետո գնացել էի առաջնագիծ, փորձեցի սնունդը, որ զինվորներն են ուտում, մեկ ժամ հետո ինքնազգացողությունս վատացավ: Հիմա որ ասում են, բանակում սննդի հարց չի եղել, նկատի ունեն՝ ծնողները միրգն էլ են ուղարկել, հացն էլ ջուրն էլ, ամեն ինչն էլ»,-ասաց Փաշինյանը:

Աղբյուր` Փաստինֆո