Փաստ ինֆո

Առ այսօր պարզ չէ, թե ի վերջո իքս օրվա դրությամբ որքան է մեր զոհերի թիվը. Հրապարակված բոլոր թվերը միմյանց հակասում են։

«Փաստինֆո»-ի գրավոր հարցմանն ի պատասխան ՀՀ առողջապահության նախարարությունից հայտնել են, որ 2020 թվականի սեպտեմբերի 27-ից առ այսօր դատաբժշկական փորձաքննության է ենթարկվել 3756 զոհված զինծառայողների և քաղաքացիական անձանց մարմին և մասունք։ Կատարվել է 2689 փորձանմուշի նույնականացում։

Նույն աղբյուրի համաձայն՝ փորձաքննության ենթարկվածներից 3425 մահվան մասին բժշկական վկայական է լրացվել։ Ասել է թե՝ ըստ առողջապահության նախարարության զոհերի թիվն այսօրվա դրությամբ կազմում է 3425։ Եւս 50 դիակից և մասունքից վերցված փորձանմուշ գտնվում են ԴՆԹ կրկնակի փորձաքննության փուլում, որոնցից փորձվում է անջատել ԴՆԹ պրոֆիլ։

Հիշեցնենք՝ երկու օր առաջ Նիկոլ Փաշինյանը նախընտրական քարոզարշավի շրջանակներում հայտարարել էր, թե ունենք 3700 զոհ, իսկ ապրիլի 14-ին ՀՀ ԱԺ-ում հայտարարել էր, թե մահվան վկայականներով հաստատված, ինքնությունները պարզված ունենք 3621 զոհ։

«Եթե այս վիճակագրությունը չփոխվի, իսկ շատ դժվար է պատկերացնել, թե որեւէ բան կփոխվի, ապա զոհերի թիվը կլինի 4 հազարի կարգի, պլյուս-մինուս 50»,- հայտարարել էր Նիկոլ Փաշինյանը։

Անցած ամիսների ընթացքում պարզվում է ոչ թե նոր նույնականացումներ են կատարվել, այլ հակառակը՝ նվազել է մահվան վկայականների թիվը։ Ասել է թե՝ գնացել ու մահվան վկայականները վերցրել են, ասել են, կներեք, սխալ ենք տվել։ Այլ բացատրություն դժվար է տալ, քանի որ ապրիլի 14-ին Ն. Փաշինյանը հայտարարել է, ինչպես նշեցինք, որ մահվան վկայականներով հաստատված, ինքնությունները պարզված ունենք 3621 զոհ, ապա Առողջապահության նախարարության կողմից «Փաստինֆո»-ին հայտնել են, որ այսօրվա դրությամբ տրվել է 3425 մահվան վկայական, իսկ թե ինչ են եղել մյուսների հետ պարզ չէ։

Նշենք, որ ոչ պաշտոնական աղբյուրները պնդում են, որ զոհերի թիվն իրականում շատ է 5-7 հազար, ինչը իշխանությունները փորձում են թաքցնել, ուստիեւ տարածում են կեղծ տվյալներ, ինչով էլ բացատրվում է հրապարակվող տվյալների անհամապատասխանությունը։

Աղբյուր` Փաստինֆո