Փաստ ինֆո

Իշխանությունը քարոզչության առաջին օրից ընտրեց ատելության խոսքի, բռնությունների և դեպի քաղաքացիական բախումներ տանող կործանարար ճանապարհը,-լրագրողների հետ հանդիպմանը հայտնեց «Պատիվ ունեմ» դաշինքի ներկայացուցիչ, «Հայրենիք» կուսակցության խորհրդի անդամ Խաչիկ Գալստյանը։

Վերջինս հայտնեց, որ Փաշինյանը հանրությանը ներկայացնելու ոչինչ չունի, քաղաքացիական վրեժի կեղծ կոչերը, որը նա համարում է իր քարոզչության հիմնական թիրախային նպատակը, այսօր արդեն պետք է սպառված համարել։

Գալստյանը նաև հիշեցրեց, որ նախընտրական քարոզչությունից առաջ 26 քաղաքական ուժերից միակ առաջնորդը Արթուր Վանեցյանն էր, որ այցելեց ԱՀ՝ ուղերձ հղելով, որ դաշինքի համար Արցախյան կարգավորման էջը ամենևին էլ փակված չէ։

«Մենք մեր արցախահայ հայրենակիցներին մենակ չենք թողնելու»,- ասաց Գալստյանը՝ կարևորելով անվտանգությունը՝ խաղաղության և կայունության համատեքստում։

Գալստյանն անդրադարձավ նաև Սերժ Սարգսյանի հրապարակած ձայնագրությանը՝ Նիկոլ Փաշինյանի մասնակցությամբ, նշեց, որ դրանով ի ցույց է դրվել ՀՀ-ն ներկայացնող և Արցախյան բանակցային գործընթացը ոչնչացրած մարդու տգիտության աստիճանը։

«Մարդ, որը խոստանում է, որ իրեն ստիպված է գժի տեղ դնել, թռնել կոնվեյերից, ազգին տանել դեպի մսաղաց, որի արդյուքնում ունեցանք 44-օրյա պատերազմ ու անդառնալի կորուստներ։ Այսպիսի կոնվեյերից է թռել Փաշինյանը, արհավիրքի դեմ է կանգնեցրել մեր ժողովրդին, որը հանդուրժել չի կարելի»։

Դիտարկմանը, որ իշխանությունը փորձում է ձայնագրությունն ի օգուտ իրենց օգտագործել՝ Գալստյանը նշեց, որ մանիպուլյացիան միակ գործիքակազմն է, որ թերևս փորձում է կիրառել իշխանությունը։

«Կային որոշակի բանակցային գործընթացներ, 30 տարիների ընթացքում երբևիցե Հայաստանին չի ներկայացվել ավելի վատթար փաստաթուղթ, քան մենք ունեցանք 44-օրյա պատերազմից հետո։ ՀՀ-ն այսպիսի նվաստացուցիչ վիճակում չի հայտնվել։ Թե ինչում օգնեց՝ անհասկանալի է»։

Գալստյանը նկատեց, որ երկրի ղեկավարը պարտավոր էր քննարկել հարցը գիտակ մարդկանց հետ։

«Երկրի ղեկին է մարդ, որը չփլաղ էր դիվանագիտությունից, որը չմո էր մարդկային հարաբերություններում և չտես էր իր որկրամոլության մեջ»։

Գալստյանը նշեց, որ այսօր դաշինքի վարչապետի թեկնածու Արթուր Վանեցյանի գլխավորությամբ քարոզարշավն իրականանում է հարավային սահմաններում։

Աղբյուր` Փաստինֆո