Փաստ ինֆո

Նիկոլ Փաշինյանը քաոսի, անկայունության նկատմամբ ունի հոգեբանական հակումներ: Նա, որպես քաղաքական գործիչ, կայացել է 2008թ-ի մարտի 1-ի բախումների ժամանակ, միտինգները, քաղաքացիական բախումները նրան շատ հոգեհարազատ վիճակներ են: «Փաստինֆո»-ի հետ զրույցում ասաց քաղաքագետ Ալեն Ղևոնդյանը՝ անդրադառնալով Նիկոլ Փաշինյանի՝ քարոզարշավի ընթացքում արված հայտարարություններին:

Նշենք, որ Նիկոլ Փաշինյանը, մասնավորապես, ասում էր՝ ընտրություններից հետո լինելու են վենդետաներ, պատրաստվեք քաղաքացիական վրեժի, պատրաստվեք քաղաքացիական վենդետաների, կադրային ջարդերի:

Քաղաքագետի գնահատմամբ՝ Փաշինյանի նմանատիպ ձևակերպումները մտնում են քրեական օրենսգրքի համապատասխան հոդվածի տակ, ուստի ՀՀ գլխավոր դատախազն այս հարցով պետք է վարույթ սկսի, քանի որ քաղաքացիական բախումների վերաբերյալ սպառնալիքները հանցակազմ ենթադրող հայտարարություններ են.

«Մյուս կողմից սա պոպուլիստական դրսևորում է, որով նա հերթական անգամ փորձում է սոցիալական արդարություն հաստատելու համար միֆական նախկիններին պատասխանատվության բերել, սա հոգեբանորեն խոցված, քաղաքական ոչ հասուն գիտակցություն ունեցող ազգաբնակչությանը մանիպուլյացիայով կերակրելու քայլ է»,-ասաց քաղաքագետը և արձանագրեց, որ երեք տարվա ընթացքում հնչեցված բոլոր մեղադրանքները միֆական նախկինների նկատմամբ որևէ արդյունքի այդպես էլ չհանգեցրին, չեղավ որևէ վարույթ.

«Այս ամենը քաղաքական թատերականացված ներկայացում է, որի հիմնական ծաղրածուն գործող վարչապետի պաշտոնակատարն է: Նա փորձում է իր հանցանքին մասնակից դարձնել մարդկանց միամիտ ու պարզ շրջանակին»,-ասաց Ալեն Ղևոնդյանը:

Քաղաքագետը Նիկոլ Փաշինյանի այս հայտարարությունները պայմանավորեց այն հանգամանքով, որ նրա վարկանիշը վերջին շրջանում կտրուկ անկում է ունեցել.

«Կա ռեյտինգի հայելային անկման վիճակ, Փաշինյանի պարագայում ռեյտինգն առնվազն 4-5 % ընկել է, մյուս կողմից՝ «Հայաստան» դաշինքի քաղաքական վարկանիշը նույնչափ, եթե ոչ ավել, բարձրացել է: Ունենք օրական կտրվածքով ռեյտինիգի փոփոխություններ: Հավատացնում եմ, այն մարդիկ, որոնց հետ Նիկոլ Փաշինյանը գնում է հանդիպումների, նրանց մի մասը A կետից B կետը տեղափոխվող միտինգավորներ են, իսկ Փաշինյանի իրական հեղինակությունը շատ ցածր է: Ինքը, հասկանալով, որ իր համար ամենասուրբ բանը՝ սեփական քաղաքական ռեյտինգը անկում է ապրում, մտնում է հիստերիկ վարքի դրսևորումների մեջ՝ իրեն թույլ տալով քրեական օրենսգրքի կարգավորման տիրույթում գտնվող հայտարարություններ»,-ասաց զրուցակիցը:

Նրա համոզմամբ՝ հետընտրական փուլում լինելու են բախումներ,որոնք լինելու են ճակատագրական.

«Անգամ լուրջ պարտության պարագայում՝ Փաշինյանն ամեն ինչ անելու է, որպեսզի իր աթոռը կարողանա պահել, նա գնալու է բախումների, իսկ այդ բախումները կարող են լինել ճակատագրական, նա ամեն քայլի գնալու է, որպեսզի իր իշխանությունը պահի, այդ թվում իր գործընկեր Ալիևի հետ որոշակի պայմանավորվածություններ է իրացնելու, սահմանային, ռազմական սրացումներ դրդելու տեսանկյունից: Նա պատրաստ է պետությունը նոր պատերազմի մեջ մտցնի, միայն թե իր աթոռից չզրկվի»,-ասաց Ալեն Ղևոնդյանը:

Հարցին՝ իսկ ի՞նչ պետք է անի ընդդիմությունը իրավիճակը կայունացնելու և բախումները կանխելու համար, քաղաքագետն ասաց.

«Ընդդիմությունը պետք է հայտարարությամբ հանդես գա, որը պետք է ստորագրեն մյուս բոլոր ուժերը, պետք է ներկայացնեն ԱԱԾ, Ոստիկանություն և Զինված ուժերի ղեկավարությունը:

Այսօր արդեն ակնհայտ է Նիկոլ Փաշինյանը քաղաքացիական հնարավոր բախումների համար պատասխանատվություն կրող է և շահագրգիռ անձ: Ընդդիմությունը պետք է նախապես ֆիքսի, որ այդպիսի ելքի պարագայում դրա հիմնական պատասխանատուն դրանք դրդող անձն է»,-ասաց Ալեն Ղևոնդյանը:

Աղբյուր` Փաստինֆո