Փաստ ինֆո

Ամենակարևոր և առաջնահերթ պահանջը, որ պիտի դրվի նոր իշխանության առաջ, պետության անվտանգությանն ու պաշտպանությանն է վերաբերվում, բանակցությունների արդյունքում՝ մեր ռազմագերիների վերադարձին, Հայաստանի և Արցախի տարածքային ամբողջականության հարցին։

Բայց որպեսզի վերևում նշածս խնդիրները նորմալ հունավորվեն և կանոնակարգված լուծման ընթացք բռնեն, պետական կառավարման համակարգը պիտի մեխանիզմի նման աշխատի՝ ամբողջովին ռեստարտի ենթարկվելով, քանի որ վերջին երեք տարիների ընթացքում բոլոր գործող ինստիտուտները ոչ միայն տևական պարապուրդի մեջ են, այլև՝ միտումնավոր կազմաքանդվել են։ Բնականաբար, այս դեպքում ռեստարտ կոչվածը պիտի ներառի նոր և նորարար մեթոդներ, բարձր պրոֆեսիոնալիզմ և կարողականություն, պետական կառավարման ոլորտը «շողուլի» բերելու կամք, ցանկություն և սրտացավություն։ Եվ այն, որ քնած թե արթուն՝ աշխատելու անհրաժեշտություն է լինելու, անկասկած է։

Սակայն, հարցը միայն պրոֆեսիոնալիզմը չէ։ Դեռ 2017-ին եմ գրել՝ պետական համակարգում բացառապես պիտի աշխատեն այնպիսի մարդիկ, պրոֆեսիոնալներ, որոնք իրենց և իրենց ընտանիքների ապագան տեսնում, պատկերացնում են Հայաստանում, ազգային-պետական արժեհամակարգի կրող են։ Այն, որ հակառակի, ընդ որում համատարածության հասնող հակառակի մասին կոնկրետ փաստեր են ունեցել պետության կազմաքանդմանը լծված զանազան սորոսական հ/կ-ները, պարզից էլ պարզ է։ Ի դեպ, այդօրինակ տեղեկատվության մասին փաստող կարևոր աղբյուր են նաև Հայաստանում դիվանագիտական առաքելություն իրականացնող օտար երկրների դեսպանատները։

Նրանք Հայաստանում գունավոր հեղափոխությունների իրականացման հնարավորության մասին տեղեկատվությունը, մեսիջը ստացել են ոչ միայն կոնկրետ առաքելություն իրականացնող դիվանագիտական և հասարակական ինստիտուտներից, այլև՝ պետոլորտի մեր մասնագետներից:

Ցավալի է, որ ժողովրդավարության և մարդու իրավունքների անվան տակ գործող, իրականում լրտեսությամբ զբաղված հ/կ-ներին տարիներ շարունակ նախորդ իշխանություններն են նաև կամա թե ակամա որպես օձ տաքացրել իրենց կրծքի տակ:

Կասկածելի նպատակներ հետապնդող հասարակական կազմակերպությունների ներկայացուցիչները պետական կառավարման համակարգերի աշխատակազմերի տարբեր ստորաբաժանումների ներկայացուցիչների առջև, այդ թվում՝ նաև՝ միջին և բարձր, հանդես գալով որպես վերապատրաստման դասընթացների բանախոսներ՝ ոչ միայն իրենց դասախոսություններով հակապետական քարոզչություն են իրականացրել, այլև՝ ամենատարբեր հարցաշարերի ու սոցիոլոգիական հարցում-հետազոտություններ անցկացնելու պատրվակով ստացել են անհրաժեշտ տեղեկատվություն՝ կառավարման համակարգում տիրող մտայնությունների և տրամադրությունների վերաբերյալ:

Տարիներ առաջ, նման մի վերապատրաստման ժամանակ՝ գրավոր հարցումների արդյունքում պարզվել էր, որ ՀՀ տարբեր գերատեսչությունների պատասխանատու աշխատակիցներից իր և իր ընտանիքի ապագան Հայաստանի հետ կապող ընդամենը մեկ պետական ծառայող կա 20-25 հոգու մեջ: Մյուսները, պարզվում է՝ չնչին իսկ հնարավորության դեպքում պատրաստ էին ընտանյոք հանդերձ հեռանալ Հայաստանից, քանի որ իրենց և իրենց երեխաների հեռանկարն այստեղ չեն պատկերացնում:

Օտար գրանտներից սնվող հ/կ-ական բանախոսն էլ մի կողմից կրակի վրա ջուր էր լցրել, մյուս կողմից՝ ուրախացել իր ստացած արդյունքի վրա:

Իսկ 2018 թվականի գունավոր հեղափոխությունից հետո այդ կարգի մարդիկ այլևս համատարած՝ օրենսդիր և գործադիր մարմինների ղեկավար պաշտոններին հայտնվեցին՝ ուղղակիորեն ներսից քայքայելով, կազմաքանդելով պետական կառավարման համակարգը։

Պետական համակարգի աշխատակիցը տվյալ պետությունը ներկայացնողն է: Պետոլորտի հենարանը, պետականամետության աստիճանը որոշողը ազգային արժեհամակարգ և պետական մտածողություն ունեցող պրոֆեսիոնալներն են, իսկ Հայաստանում իրենց ապագան չտեսնող ու չպատկերացնողներից պիտի ձերբազատվել, նման պաշտոնյաներ պիտի պետական համակարգերում չլինեն։ Իմ խորին համոզմամբ՝ նոր իշխանությունը ազգային անվտանգության ոլորտի առաջնահերթ խնդիր պիտի դարձնի կասկածելի- օտար աղբյուրներից սնվող հ/կ-ների շրջանում լրջագույն սանացիայի իրականացումը։

Ի դեպ, շատ կարևոր է նաև, որ պետոլորտում աշխատանքի ընդունվող յուրաքանչյուր մասնագետ ոչ թե զանազան հ/կ-ների, այլև՝ անձնակազմի կառավարման ստորաբաժանման մշակած հարցաշարը լրացնի, ուր ներառված կլինի կարևոր հարցը՝ պետական համակարգում աշխատելու ցանկություն ունեցող անձը իր և իր ընտանիքի ապագան կապու՞մ է Հայաստանի Հանրապետության հետ։

Հեղինակ՝ Ա․Ե․

Աղբյուր` Փաստինֆո