Փաստ ինֆո

Մինչ թշնամին խրամատներ է կառուցում Սյունիքում ու Գեղարքունիքում, ամրապնդվում մեր դիրքերում՝ ՀՀ իշխանությունները դատում են թուրքի դեմ ըմբոստացող սահմանամերձ բնակավայրերի համայնքապետերին։

«Փաստինֆո»-ի հաղորդմամբ՝ քննչական կոմիտեն ավարտել է Քաջարանի համայնքապետ Մանվել Փարամազյանի և մյուսների քրեական գործով նախաքննությունը ու գործն ուղարկել դատարան։ Դատական տեղեկատվական համակարգի համաձայն՝ քրեական գործը դատարան մուտք է եղել հունիսի 4-ին և նույն օրը մակագրվել Սյունիքի մարզի ընդհանուր իրավասության դատարանի դատավոր Բորիս Բախշիյանին։

Քրեական գործով մեղադրյալները հինգ են՝ Մանվել Փարամազյանը, Մարատ Ստեփանյանը, Խորեն Միրզոյանը, Բաբկեն և Լևոն Համբարձումյանները։ Ըստ մեղադրանքի՝ Մանվել Փարամազյանը հորը՝ Վրեժիկ Փարամազյանին հարվածելու համար Շավարշ Մարգարյանին ցուցադրաբար պատժելու և իր հեղինակությունը վերահաստատելու նպատակով կազմակերպել է խմբի կողմից նախնական համաձայնությամբ, բռնության գործադրմամբ Շավարշ Մարգարյանի առևանգումը:

Հիշեցնենք, որ քաջարանցիների գործի վերաբերյալ աղմուկը բարձրացվել էր 2020թ մայիսի 24-ին, երբ Երեւանից հատուկ ջոկատայիններ են գործուղվել Սյունիք ՝հատուկ գործողություններ իրականացնելու նպատակով: Վաղ առավոտյան սպեցնազն անցել էր գործի եւ 4 անձ բերման է ենթարկվել։ Հետագայում՝ մեկ հոգին ազատ է արձակվել. Հայտարարվեց, թե նրան սխալմամբ էին բերման ենթարկել ու հենց նրա նկատմամբ էլ ոստիկանության բաժնում բռնություն է գործադրվել։ Համենայն դեպս՝ մամուլում տարածվել էր բռնության հետքերով լուսանկարները։ Ոստիկանության բաժնի մոտ հավաքվել էին մեծ թվով քաջարանցիներ՝ պահանջելով ազատություն ու արդարություն։

Նրանք բողոքի ակցիան դադարեցրին միայն այն բանից հետո, երբ Քաջարանի համայնքի ղեկավարը հայտարարեց, որ իրեն հավաստիացրել են, որ ոստիկանության բաժնում կիրառված բռնության դեպքի առթիվ պատշաճ քննություն կընթանա։

Ձերբակալվածները տեղափոխվեցին Երեւան, եւ այստեղ փաստաբանները բողոքարկեցին նրանց ձերբակալելու որոշումները։ Դատարանը բոլոր երեք դեպքում էլ ձերբակալությունը համարել էր ոչ իրավաչափ ու ազատել արգելանքից՝ գտնելով, որ բացակայում է հիմնավոր կասկածը։

Ավելի ուշ հայտնի դարձավ, որ տուժողը եւս հրաժարվել է իր նախնական ցուցմունքից՝ նշելով, որ իրեն տուժող չի ճանաչում եւ նախնական ցուցմունքը տվել է ճնշումների ազդեցության տակ։ Այդուհանդերձ՝ քննչական կոմիտեն հայտնեց, որ քրեական գործով ընդհանուր առմամբ 4 անձի մեղադրանք է առաջադրվել ու միջնորդություն ներկայացվել նրանց նկատմամբ որպես խափանման միջոց կալանավորումն ընտրելու վերաբերյալ։

Դատավոր Արտուշ Գաբրիելյանը մերժել էր մեղադրյալ Մարատ Ստեփանյանին կալանավորելու մասին քննիչի միջնորդությունը՝ արձանագրելով, որ բացակայում է հիմնավոր կասկածը։

Մյուս երեք մեղադրյալները՝ Խորեն Միրզոյանը, եղբայրներ՝ Լևոն և Բաբկեն Համբարձումյանները կալանավորվել են։ Ընդ որում՝ Երևանի ընդհանուր իրավասության դատարանը Բաբկեն Համբարձումյանի խափանման միջոցի հարցը քննարկելիս հաշվի չի առել նաեւ այն հանգամանքը, որ նա ունի մանկահասակ՝ 2 տարեկան զույգ երեխա, որոնցից մեկն ունի առողջական բավականին լուրջ խնդիրներ՝ գանգի ոսկորների ճողվածք, որի բուժումը բավականին ծախսատար է և ընտանիքին ֆինանսական հոսքից զրկելը, ըստ պաշտպանների, ծանր հետևանք կարող է ունենալ երեխայի համար։

Հետագայում քրեական գործով անցնող բոլոր մեղադրյալների նկատմամբ որպես խափանման միջոց է կիրառվել ստորագրությունը՝ չհեռանալու մասին։

Աղբյուր` Փաստինֆո