Փաստ ինֆո

Ես ուզում եմ բոլորիցդ, ներառյալ ներկա մեր գերեվարված հարազատներից, ներողություն խնդրել, որ մինչև այժմ մենք ի վիճակի չենք եղել գերիների խնդիրը լուծել։ Բայց դուք պետք է իմանաք, որ այս ընթացքում արվել է առավելագույնը՝ այդ խնդիրը լուծելու համար։ Ինքն ունի բազմաթիվ շերտեր, բայց ես այս ընթացքում համոզվել եմ մի բանում, որ մենք ինչքան մանրամասն ենք խոսում այս թեմայի մասին, այնքան խնդրի լուծումն ուշանում է։ Ուզում եմ ասել, որ ես անձամբ ամենօրյա ռեժիմով և նույնիսկ ճանապարհներին, այդ թեմայի վրա աշխատում եմ։ Այս մասին Ազատան համայնքում քաղաքացիների հետ հանդիպմանն ասել է Նիկոլ Փաշինյանը.

«Այս ընթացքում գնում են ամենատարբեր խոսակցություններ, բանակցություններ են քննարկվում։ Ես ասում եմ, որևէ կասկած չունեմ, որ մենք այդ խնդիրը լուծելու ենք։ Չեմ թաքցրել ու հիմա էլի եմ ասում, որ փորձ է արվում այդ խնդիրը մեր ներքին հարցերի վրա ազդեցություն ունենալու համար օգտագործել։ Պետք չէ նաև դա ժխտել»,-ասաց Փաշինյանը՝ վստահեցնելով, որ ժամանակի հարց է, կլինեն կոնկրետ արդյունքներ այս ուղղությամբ.

«Մեր դիրքորոշումը չի փոխվել, հանձնարարել եմ նաև ադրբեջանական կողմին պաշտոնապես փոխանցեն՝ իմ որդին պատրաստ է պատանդի կարգավիճակով գնալ Բաքու՝ մեր բոլոր գերիների դիմաց, նման թեմա եղել է նաև գերիների հարազատների հետ հանդիպմանը, նրանց ես ասել եմ՝ եթե իմանամ այս ճանապարհով կլուծվի հարցը, մեկ րոպե չկասկածեք, որ կգնանք դրան»,-ասաց Փաշինյանը:

Աղբյուր` Փաստինֆո