Փաստ ինֆո

Որևէ տարբերություն չկա վարչապետի պաշտոնակատարն արձակուրդում է, թե աշխատանքի է։ Լրագրողների հետ զրույցի ժամանակ այս մասին ասաց ԱԺ «Լուսավոր Հայաստան» խմբակցության պատգամավոր Անի Սամսոնյանը։

«Երբ նա իր աթոռին նստած է, երկրում տեղի են ունենում նույն խնդիրները, և թշնամին անարգել կարողանում է գալ ու նստել մեր տարածքում։ Երբ նա արձակուրդում է, շարունակվում են նույն խնդիրները։ Սա ևս մեկ անգամ ցույց է տալիս, որ վարչապետի այս պաշտոնակատարը որպես կառավարիչ, որպես ղեկավար որևէ գործոն չունի»,-նշեց Անի Սամսոնյանը։

«Լուսավոր Հայաստան» կուսակցության ներկայացուցիչները քայլեցին Աջափնյակ համայնքի փողոցներով և բակերով, և նշեցին, որ իրենց նպատակը երկրում համերաշխության հաստատումն է, որի շնորհիվ միայն կկարողանան կյանքի կոչել իրենց ծրագրերը, որոնք միտված են հաղթահարելու այն ծանր մարտահրավերները, որոնք այսօր ծառացել են մեր երկրի առջև։

«Մենք կարող ենք հասնել հանրային համերաշխության, որովհետև այլ տարբերակ ուղղակի չկա։ Քանի դեռ մենք իրար միս ենք ուտում, քանի դեռ իրար դեմ ենք պայքարում, թշնամին օր օրի մետր առ մետր առաջ է գալիս։ Բոլոր մարտահրավերները հաղթահարելու միակ տարբերակը համախմբվելն է»,-նշեց Գևորգ Գորգիսյանը։

Աղբյուր` Փաստինֆո