Փաստ ինֆո

Թույլ տվեք ներողություն խնդրել ժողովրդից՝ Ռոբերտ Քոչարյանի, Սերժ Սարգսյանի և Նիկոլ Փաշինյանի կողմից վարվող նախընտրական քարոզարշավի ընթացքում օգտագործվող բառամթերքի համար։ Ես որպես ՀՀ քաղաքացի ամաչում եմ, որ Հայաստանը երբևէ կառավարած և կառավարող քաղաքական լիդերների կողմից այսպիսի տոնայնությամբ, շեշտադրումներով, վիրավորանքներով, անձնական թշնամանքի հասնող տրամադրվածությամբ քարոզարշավ է իրականացվնում։ Այս մասին հրավիրված մամուլի ասուլիսին ասաց «Արդար Հայաստան» կուսակցության նախագահ Նորայր Նորիկյանը։ 

«Ցանկանում եմ ուղղակիորեն զգուշացնել մեր ժողովրդին, որ պետք է իսկապես սթափվենք՝ այսպիսի տրամադրվածությամբ լսելով այդ մարդկանց, որովհետև նրանց քարոզչությունն ինձ բերել է համոզման, որ դժբախտաբար այդ մարդիկ կորցրել են բանականության և բարոյականության թույլատրելի կամ հատելի սահմանը»,- նշեց Նորիկյանը՝ հավելելով, որ իր համար անընդունելի և դատապարտելի է հայ ժողովրդի հետ նման շեշտադրումներով խոսելը։

Նորիկյանի կարծիքով՝ վերջիններս բավականին ժամանակ ունեին նման առոգանությամբ արդյունավետ կառավարում իրականացնելու, որի արդյունքում կունենայինք որակապես այլ պետություն, որակապես այլ հասարակություն և մեր անվտանգային միջավայրը բոլորովին այլ կերպ կլիներ։

«Ինձ համար Ռոբերտ Քոչարյանի և Սերժ Սարգսյանի անցած ճանապարհը, կերպարը և նրանց օգտագործած բառամթերքն անհասկանալի, դատապարտելի է, բայց խոսքս ցանկանում եմ հղել Նիկոլ Փաշինյանին։ Նիկոլ, Դուք պաշտոնապես զբաղեցնում եք Հայաստանի գործադիր իշխանության ղեկավարի աթոռը, չի սազում ՀՀ մեր ժողովրդին, պատիվ չի բերում յուրաքանչյուրին այսպիսի տոնայնությամբ, այսպիսի շեշտադրումներով հանդես գալ։ Երեք տարի ժամանակ ունեիք՝ Ձեր այսօրվա քաղաքական դիակներին կենսունակ դարձնելու փոխարեն նրանց պատասխանատվության հարցը լուծելու, ՀՀ-ում վերականգնելու օրինականության գործընթացը, ստեղծելու առողջ միջավայր»,- նշեց Նորիկյանը՝ խնդրելով հայրենակիցներին սթափ գնահատել իրավիճակը։

Նորիկյանի դիտարկմամբ՝ ցանկացած պահի այս փոխադարձ կրակոցները կարող են վերածվել անվերահսկելի գործընթացի, որը լրջագույն խնդիրներ կարող է առաջացնել հետընտրական գործընթացում։

Աղբյուր` Փաստինֆո