Փաստ ինֆո

Նիկոլ Փաշինյանն ամեն ինչ անելու է, որ հարամ անի այն ընտրությունները, որով ինքը չի կարողանալու վերարտադրվել։ Մամուլի ասուլիսի ժամանակ այս մասին ասաց ՀՅԴ ԳՄ անդամ, «Հայաստան» դաշինքի անդամ Արմեն Ռուստամյանը։

«Մարդն անձնական հարց ունի։ Նիկոլն այսօր փրկվելու մեկ շանս ունի՝ պահպանի իր իշխանությունը։ Ուրիշ մոտիվացիա չկա։ Եթե նոր խորհրդարանում մեծամասնություն չունենա, նշանակում է՝ կկորցնի վարչապետի աթոռը, ինչը նշանակում է, որ միանգամից կհայտնվի այն մեղադրանքների պատասխանատվության առաջ, որից մինչև հիմա կարողացել է խուսափել միայն այդ պաշտոնով պատսպարվելով։ Նիկոլի համար Հայաստանը դարձել է իր պատսպարանը, մնացած բոլոր ուժային կառույցները զբաղված են այդ մեկ անձի անվտանգությունն ապահովելով, և ինքն իր ֆիզիկական անվտանգությունը լուծելու հարց ունի։ Նա ամեն ինչ կանի, որ վերարտադրվի, դրան էլ պետք է պատրաստ լինենք»,-ասաց Արմեն Ռուստամյանը։

Վերջինս նկատեց՝ եթե փորձի ընտրությունները կեղծել, ապա նրանք լեգիտիմ բոլոր հնարավորություններն ու իրավունքն ունեն ցանկացած եղանակով նրան իշխանությունից հեռացնելու։

«Եթե մինչև հիմա կարողանում է հայտարարել, որ լեգիտիմ ընտրված վարչապետ է, ընտրություններից հետո դա էլ է կորցնելու։ Ընտրություններից հետո չի կարող ասել, որ ընտրված վարչապետ է, քանի որ մենք կարձանագրենք, որ նա փորձել է վերարտադրվել և չունի այդ լեգիտիմությունը»,-ասաց Արմեն Ռուստամյանը։

Աղբյուր` Փաստինֆո