Փաստ ինֆո

Կան քաղաքական ուժեր, որոնք իրենց քարոզարշավն իրականացնում են այն տրամաբանությամբ, որ գալու են վերցնեն իշխանությունը, մինչդեռ՝ մենք ասում ենք, որ ժողովուրդը կորոշի, ժողովուրդը ինչպես որոշի, այդպես էլ կլինի։ Ոմանք ասում են, որ հունիսի 20-ին և դրանից հետո իրենք կրելու են, մենք էլ ասում ենք՝ ձեր պատիժն եք կրելու՝ 2021թ հունիսի 20-ից հետո։ Այս մասին Փարաքար համայնքի բնակիչների հետ հանդիպմանն ասել է Նիկոլ Փաշինյանը։

Փաշինյանը հայտարարեց, թե ժողովուրդը որոշում է, իրենք էլ՝ անում են, 2018թ իրենք հանդես են եկել առաջարկով, ժողովուրդը որոշեց՝ իրենք իրականացրին։

«Ոչ թե իրականացրինք, այլ՝ առաջնորդեցինք ոչ բռնի թավշյա ժողովրդական հեղափոխությունը։ 2021թ հունիսի 20-ին էլի դուք որոշելու եք, մենք ձեր որոշումն ի կատար ածելու։ Եթե ձեր որոշումը պետք է լինի այն, որ մենք պետք է առաջնորդենք, շարունակենք առաջնորդել երկիրը, մենք այդպես էլ կանենք։ Եթե ձեր որոշումը կլինի, որ այդպես պետք է չլինի, այդպես էլ կանենք»,- նշեց Փաշինյանը՝ հավելելով, որ պետք է ժողովուրդը երկրի տիրոջ իր զգացողությունը և կարգավիճակը չկորցնի։

Վերջինս նշեց, թե համոզված է, որ 2021թ հունիսի 20-ին ՀՀ քաղաքացին կվերահաստատի իր իշխանությունը, որովհետև իրենք նույնիսկ չեն ասելու, որ ժողովուրդը քվեարկի իրենց օգտին, կասեն՝ ժողովուրդը պետք է քվեարկի իր օգտին։

«Մենք լավ իշխանություն ենք, վատ իշխանություն ենք, մենք այնպիսի իշխանություն ենք, ինչպիսիք իշխանություն է մեր ժողովուրդը, որովհետև մենք մեր ժողովրդից ենք դուրս եկել և մենք մեր ժողովրդի առաջ եղել ենք լիարժեք, եղել ենք և կանք, կմնանք ազնիվ »,- հայտարարեց Փաշինյանը։

Աղբյուր` Փաստինֆո