Փաստ ինֆո

Ընտրողը պետք է որոշի՝ ուզում է փրկել Նիկոլի՞ն, թե՞ ուզում է փրկել մեր երկիրը։ Մամուլի ասուլիսի ժամանակ այս մասին ասաց ՀՅԴ ԳՄ ներկայացուցիչ, «Հայաստան» դաշինքի անդամ Արմեն Ռուստամյանը։

«Քաղաքացիները պետք է մասնակցեն ընտրություններին՝ առանց որևէ ճնշման տրվելու, կլինի դա ընտրակաշառք, թե որևէ այլ միջոց, որով կարող են ազդել նրանց ընտրության վրա։ Սա այդ դեպքը չէ։ Այստեղ լինել-չլինելու հարց է որոշվում և ոչ մի բան չի կարող գերակա լինել այդ ընտրության կարևորության հետ համեմատած։ Երբ ասում ենք առանց Նիկոլ Հայաստան, Նիկոլը համարում է, որ այդ Հայաստանը եղել է քայքայված։ Մարդ այսօր նամուսը պետք է կորցնի, որ այսքան կորուստներից հետո այն Հայաստանը, որը ժառանգել է և դրանից մասունքներ է թողնում, համարի քայքայված Հայաստան։ Այս ընտրությունները նաև դրանով են առանձնահատուկ։ Հնարավորություն կա 30 տարիները վերլուծելու։ 27 տարին, որն առանց Նիկոլի է եղել, քայքայվա՞ծ Հայաստան էր։ Քայքայված Հայաստանը ո՞նց էր ունենում ամենահեղինակավոր և հաղթած բանակն այս տարածաշրջանում։ Այդ Հայաստանը կարող է իր լիազորությունները հաստատել 42 հազար քմ տարածքի վրա։ Այսօր Նիկոլը եկել է և այդ 42-ից 10-ն արդեն նվիրել է հակառակորդին»,-նշեց Արմեն Ռուստամյանը։

Վերջինս ընդգծեց՝ լուրջ մարտահրավերի առաջ ենք կանգնած և պարտավոր ենք լրջությամբ մոտենալ ընտրություններին ու հասկանալ՝ հնարավորություն ունենք, որ հասկանանք, թե ինչպիսին է եղել առանց Նիկոլ Հայաստանը 27 տարիների ընթացքում և ինչպիսին էր վերջին 3 տարիների ընթացքում։

Աղբյուր` Փաստինֆո