Փաստ ինֆո

Եթե պատերազմ է, թշնամին սահմանիդ է կանգնած, այդ պարագայում մենք որևէ մեկի հետ համագործակցությունը չենք բացառում: Այս մասին լրագրողների հետ զրույցում հայտարարել է «Հանրապետություն» կուսակցության ղեկավար Արամ Սարգսյանը՝ պատասխանելով լրագրողի հարցին՝ արդյո՞ք կհամագործակցեն Ռոբերտ Քոչարյանի գլխավորած քաղաքական ուժի հետ, Արամ Սարգսյանն ասաց, որ այդ ուժի հետ հակառակ գաղափարներ ունեն.

«Եթե պատերազմ է, պատերազմի ժամանակ մեր կուսակցության համար կա միայն արտաքին թշնամի, մենք ներքին թշնամի չունենք: Ոչ պատերազմական իրավիճակներում մենք համագործակցելու ենք միայն իրար մոտ, կամ իրարից ոչ հեռու գաղափարներով ուժերի, իսկ Ռոբերտ Քոչարյանի թիմի հետ մենք կատեգորիկ հակառակ գաղափարական մոտեցումներ ունենք։  Մեր անցած ճանապարհով, մեր ունեցած ուղով այդ համագործակցությունը ոչ միայն ընկալելի չի լինի, այլ նաև հանրությունը չի ընդունի: Բայց հնարավոր է իրավիճակ, երբ հանրությունը չուզենա ընտրությունների երկրորդ փուլ, այդ իրավիճակում ստիպված պետք է լինենք կողմնորոշվել»,-ասաց Արամ Սարգսյանը և ավելացրեց. «Մեր կուսակցությունը համախոհների և ընկերների միություն է, և պարտադիր պետք է այդ հարցն իրենց հետ քննարկել, կլինեն մարդիկ, կասեն՝ պետք է համագործակցել, կլինեն նաև մարդիկ, որ կասեն՝ որևէ պարագայում պետք չէ համագործակցել: Այդ մարդկանց տեսակետը հաշվի առնելուց հետո միայն ես կարող եմ ասել՝ կհամագործակցենք կամ չենք համագործակցի, հիմա պատրաստ չեմ դրան պատասխանելու: Հիմա հակված եմ ընրություններում ստանալ այնքան քվե, որ այլոք մեզ առաջարկեն համագործակցելու և միասնական իշխանություն կազմելու, մենք ընտրություններին գնում ենք այդ մոտեցումով»,-ասաց նա:

Անդրադառնալով իրենց կուսակցության գաղափարական մոտեցումներին՝ Արամ Սարգսյանը նշեց, որ պետք է քայլ առ քայլ դուրս գալ Ռուսաստանից ունեցած կախվածությունից.

«Ռուսաստանը մեր դաշնակիցը չէ և մեր գործընկերը չի: Ի տարբերություն մյուս ուժերի, որոնք ասում են՝ պետք է Ռուսաստանի հետ հարաբերությունները խորացնել, մենք գտնում ենք, որ այն կախվածությունը, որն ունենք Ռուսաստանից, քայլ առ քայլ դրանից պետք է դուրս գանք, վերագտնենք մեր անկախություն, պետք է դիվերսիֆիկացնենք մեր արտաքին քաղաքականությունը՝ ներգրավելով Եվրոպային և ԱՄՆ-ին: Այս տարբերակով է, որ հնարավոր է բալանսավորել մեր արտաքին քաղաքականությունը»,-ասաց Արամ Սարգսյանը:

Աղբյուր` Փաստինֆո