Փաստ ինֆո

Փաստաբան Էդգար Թումասյանը ՄԻԵԴ գանգատ է ներկայացրել՝ քրեական գործերից մեկով իրականացված օպերատիվ-հետախուզական միջոցառումների վերաբերյալ՝ Մարդու իրավունքների եվրոպական կոնվենցիայի 6-րդ, 8-րդ և 13-րդ հոդվածների՝ անձի արդար դատաքննության իրավունքի, անձնական և ընտանեկան կյանքը հարգելու և իրավական պաշտպանության արդյունավետ միջոցի իրավունքների խախտման հիմքով։ Քրեական գործը, որի շրջանակներում փաստաբանը ներպետական ատյանների միջոցով վիճարկել է վարույթ իրականացնող մարմնի կողմից օպերատիվ-հետախուզական միջոցառումներ իրականացնելու մասին որոշումները, ապա գանգատ ներկայացրել ՄԻԵԴ, վերաբերում է ԱՊՊԱ-ներից խարդախությամբ գումար հափշտակելուն, սակայն առաջիկայում գանգատներ կներկայացվեն նաև այլ քրեական գործերով իրականացված ՕՀՄ-ների վերաբերյալ։ 

Փաստաբան Էդգար Թումասյանը «Փաստինֆո»-ի հետ զրույցում հայտնեց, որ գաղտնալսումների, ներքին դիտումների և մյուս ՕՀՄ-ներով, որոնք իրականացվում են դատարանի որոշմամբ, դեռևս 2019թ․-ից վերաքննիչ բողոքներ է ներկայացնում, որտեղ պարզվում է, որ առաջին ատյանի դատարանի վարույթներում բացակայում են հիմնավորող նյութերը։

«Առաջին նման բողոքներից մեկը քննում էր Վերաքննիչի դատավոր Արշակ Վարդանյանը։ Նիստին հրավիրեցինք ԱԱԾ ներկայացուցչին և խնդրեցինք տրամադրել այն նյութերը, որոնք ներկայացրել են Առաջին ատյանում, որպեսզի հասկանանք, թե դրանք բավարար են եղել, թե ոչ։ ԱԱԾ ներկայացուցիչները հրաժարվեցին տալ՝ ասելով, որ գաղտնի նյութեր են, Վերաքննիչին ու կողմին չեն կարող տրամադրվել։ Պարոն Վարդանյանը դիմեց Սահմանադրական դատարան, ՍԴ-ն էլ որոշում կայացրեց, որից հետո պարոն Վարդանյանն առաջինը բավարարեց բողոքը ու վերացրեց ՕՀՄ-ն, դրանից հետո նման բողոքները մակագրվում են այլ դատավորների, որոնք ՍԴ որոշումն անտեսելով ու առանց որևէ նյութի հետազոտության մերժում են բողոքները»,- նշեց Թումասյանը։

Ըստ փաստաբանի՝ անգամ ՍԴ որոշումից հետո ներպետական դատական ատյաններում այս հարցի հետ կապված չձևավորվեց միասնական դատական պրակտիկա, ավելին՝ դատարաններն այսօր ուղղակի անտեսում են Սահմանադրական դատարանի որոշումը և չեն կիրառում դրանում արտահայտված իրավական դիրքորոշումները։ Թումասյանի դիտարկմամբ՝ ՕՀՄ-ները բողոքարկվում են ոչ միայն կոնկրետ գործով ցանկալի արդյունքն ապահովելու, այլ՝ բոլորին համատարած գաղտնալսելու և անձնական կյանքի և հաղորդակցության գաղտնիության իրավունքն անհիմն սահմանափակելու երևույթը կանխելու համար։

Հեղինակ՝ Իզաբել Սահակյան

Աղբյուր` Փաստինֆո