Փաստ ինֆո

Մինչ օրս մեր հիմնարկի կողմից 3500-ից ավելի դիակի եւ դիակի մասունքների փորձաքննություն է կատարվել։ Բարդագույն փորձաքննություններ կարողացանք իրականացնել մեր մասնագիտական բարձր որակի եւ պատասխանատվության արդյունքում, քանզի հասկանում եք, որ զինվորների փորձաքննությունները սովորական փորձաքննություններ չէին։ Այսօր հրավիրված ասուլիսում հայտնեց Հանրապետական դատաբժշկական կենտրոնի Արարատի մարզի դատաբժշկական փորձաքննությունների բաժնի վարիչ Արմեն Գևորգյանը՝ հավելելով, որ գործ չեն ունեցել թարմ, նոր դիակների հետ, այլ՝ ռազմի դաշտում թողնված, արևի,  կենդանիների կողմից քայքայման ենթարկված, հուղարկավորված և արտաշիրիմված դիակների հետ:

Ըստ Գևորգյանի՝ պատերազմական իրավիճակը նախատեսում է ոչ ստանդարտ աշխատելաոճ ցանկացած բնագավառի համար։ Աշխարհի որևէ առաջադեմ երկիր  պատրաստ չէ, նույն դատաբժշկական փորձաքննությունների ասպարեզում, իրագործել իր օրական նորմավորված  փորձաքննություններից տասնյակ, հարյուրավոր անգամ ավելի փորձաքննություն: 

«Սա ֆորսմաժորային վիճակ էր, սակայն պատերազմի առաջին օրվանից ձեռնարկել ենք սառնարանային համակարգի ձեռքբերմանն ուղղված աշխատանքներ»,- ասաց դատաբժշկական փորձագետը՝ հավելելով, որ Գորիսում, Ստեփանակերտում, Մարտունիում իրենց հիմնարկի ղեկավարության պահանջով և ՊՆ օժանդակությամբ ստեղծվել են այդ շարժական սառնարանները։  

«Իմ անձնական նախաձեռնությամբ Արտաշատում, միգուցե նախատեսված է եղել մրգի պահպանման համար, բայց եվրոպական ամենավերջին ստանդարտներին համապատասխան սառնարանային համակարգ ենք վերցրել՝ մեր զինվորների դիակները պահպանելու համար, քանի որ նման ծավալ որևէ առանձին դիահերձարանի սառնարանում հնարավոր չէր պահել»,-հայտնեց Արմեն Գևորգյանը:

Մասնագետի խոսքով՝ դիակների նորմալ պահպանման ջերմաստիճանը 2-6 աստիճան է: Իսկ թե ինչո՞ւ են՝ այս սառնարանային համակարգերի առկայության դեպքում անգամ, դիակների մասունքների մեջ եղել թրթուռներ ու որդեր, ըստ Գևորգյանի՝ կապված է նրա հետ, որ գործ են ունեցել ոչ թարմ դիակների հետ։ 

«Ի ցավ ինձ եւ բոլորին, տեղեկացնեմ՝ մենք ունեցել ենք թարմ դիեր պատերազմի առաջին մեկ-երկու օրը։ Դրանից հետո, քանի որ դիերը գտնվում էին ոչ մեր ենթակայության տակ եղած տարածքում, դժվար էր դրանք հետ բերել։ Պատկերացրեք՝ արեւ, կենդանիներ, դրանց ազդեցությամբ որդեր, թրթուրներ։ Մեզ մոտ բերել են դիերը ծայրահեղ ծանր աստիճանի նեխման, կազմափոխման, փափուկ հյուսվածքների մեծ մասի եւ ներքին օրգանների բացակայությամբ, ամբողջովին որդերով եւ թրթուրներով պատված։ Մենք որպես մեր եղբոր ու որդու ենք վերաբերվել եւ մտել ու աշխատել, չնայած անտանելի հոտ էր, անտանելի էր նման միջավայրում աշխատելը։ Բոլոր նմուշները մեկ առ մեկ համարակալվել են, դիերը՝ նույնպես»,-պատմեց Արարատի մարզի դատաբժշկական փորձաքննությունների բաժնի վարիչը։

Նրա հավաստմամբ,  այդ թրթուրների պայմաններում են արել փորձաքննություն, քանզի պարտք են տվել աստծու առաջ, իրենց՝ խղճի դիմաց։  Գևորգյանի խոսքով՝ դիակների մեծ մասը եղել են անճանաչելի.

«Այդ զինվորների դիերը որեւէ մշակման ենթակա չեն եղել, քանի դեռ տվյալ դիակից չենք կարողացել վերջնական անջատել գենետիկ նյութը, քիմիական նյութով այդ դիակի վրա ազդելու իրավունք չունենք։ Պատկերացրեք՝ առանց դագաղի հուղարկավորված դիակ, հողի ամբողջ ագրեսիվ նյութերով, միջատներով։ Շահարկվում է՝ ճանճի թրթուրներ են եղել։ Այո, այդ թրթուրների պայմաններում ենք արել փորձաքննություն։ Դրանք բերվում են պոլիէթիլենային դիապարկերով, դրանց տրվում է եռաթիվ կոդ, բոլորն անխտիր մատենավարվում են, որևէ թաքցրած դիակի մասին խոսք լինել չի կարող»,-հավաստիացրեց դատաբժշկական  փորձագետը։   

Աղբյուր` Փաստինֆո