Փաստ ինֆո

Սրանք մարդ չեն, սրանք կենսագրություն չեն ունեցել, չունեն անցյալ, չեն ունենալու ապագա, իսկ ներկան լինելու է ամոթալի,- հայտարարել է «Հայրենիք» կուսակցության նախագահ, «Պատիվ ունեմ» դաշինքի վարչապետի թեկնածու Արթուր Վանեցյանը՝ խոսելով ՀՀ վարչապետի աշխատակազմի ղեկավար Արսեն Թորոսյանի գրառման մասին։

Նշենք, որ գործող իշխանություններ ներկայացուցիչ հանդիսացող Ա.Թորոսյանը նախօրեին իրեն թույլ էր տվել անհարգալից արտահայտություններ ՀՀ երկրորդ նախագահ Ռոբերտ Քոչարյանի հասցեին՝ նրան դիմելով «ընկեր Ռոբ»։

«Փաստինֆո»-ի հաղորդմամբ՝ Արցախ մեկնելու ճանապարհին Տիգրան Աբրահամյանի հետ քննարկելով վերջին իրադարձություններն ու Արսեն Թորոսյանի գրառումը՝ Վանեցյանն ընդգծել է, որ այդ մարդիկ անհայտ ծագման են, որոնք չեն ունեցել անցյալ ու չեն ունենալու նաեւ ապագա ու պետք է անպայման իրենց տեղը ցույց տրվի։

«Ով է ճանաչել իրենց մինչև պաշտոն ստանալը, իրենք ո՞վ են եղել։ Անհայտ ծագման մարդիկ են, Արցախը հանձնած և այսօր Արցախն ազատագրած մարդկանց են փնովում, փորձում քննադատել»,- ասել է Ա.Վանեցյանն ու ավելացրել. «Սրանք մարդ չեն, սրանք կենսագրություն չեն ունեցել և սրանց տեղը պետք է անպայման ցույց տրվի, նրանք պետք է հայտնվեն նույն տեղում, որտեղից դուրս են եկել։ Իսկ իրենք չունեն անցյալ, չեն ունենալու ապագա, իսկ ներկան լինելու է ամոթալի»։

Աղբյուր` Փաստինֆո