Փաստ ինֆո

Մոսկովյան բանակցությունները եղել են շատ բովանդակային և  ամենաբարձր մակարդակով շարունակվում են: Այս մասին լրագրողների հետ զրույցում ասաց վարչապետի աշխատակազմի ղեկավար Արսեն Թորոսյանը:

Նշենք, որ երեկ ՊՆ հաստատեց այն տեղեկատվությունը, որ Հայաստանի, Ռուսաստանի և Ադրբեջանի միչև վերսկսվել են բանակցությունները:

Թորոսյանն անդրադառնալով լրատվամիջոցներում տարածված լուրերին, թե պաշտպանության նախարարը մոսկովյան բանակցություններից վերադարձել է ձեռնունայն՝ ասաց, որ այդպիսի կտրուկ  որակումներ պետք չէ տալ՝ թե Ռուսաստանից վերադարձել են ձեռնունայն, կամ բանակցությունները արդյունք չեն տվել։ 

«Բանակցություններն ամենաբարձր մակարդակով շարունակվում են, մոսկովյան բանակցությունները նույնպես բավական բովանդակալից են եղել, և հստակ շեշտադրումներ են արվել և դրանք շարունակվելու են, որ հասնենք այն հանգուցալուծման, որի մասին բազմիցս խոսել ենք։ Ադրբեջանական զինված միավորումները պետք է լքեն Հայաստանի սուվերեն տարածքը, և դա տեղի է ունենալու մեր ռազմավարական գործընկերոջ և գործընկերների հետ համագործակցության արդյունքում, ինչպես նաև մեր ԶՈւ աշխատանքի արդյունքում»,- ասաց նա՝ հավելելով, որ շարունակական բանակցությունների վերաբերյալ եթե հանրությանը անհրաժեշտ լինի տեղեկատվություն հայտնել, ապա դա պաշտոնական կերպով կարվի, ինչպես մինչ օրս արվել է։

Թորոսյանի խոսքով՝ հաջորդ հանդիպման օրվա, ժամի կամ մասնակիցների վերաբերյալ այս պահին տեղեկատվություն չունի, բայց ներքաղաքական պրոցեսները որևէ կերպ չեն առնչվում պետական գերատեսչությունների աշխատանքի և աշխատանքի ինտենսիվության վրա։

«Ներքաղաքական պրոցեսները որևէ կերպ չեն անդրադառնում մեր պետական գերատեսչությունների աշխատանքի վրա: Համաձայնության գալու համար ժամանակ է պետք: Ձեռքբերում կա այն իմաստով, որ ամենաբարձր մակարդակով մեր անվտանգային համակարգում միակ գործընկերոջ հետ կա փոխըմբռնում, թե ինչպես պետք է հանգուցավուծվի այս խնդիրը: Եվ Ռուսաստանը ջանքեր է գործադրում, որպեսզի հարցի լուծումը լինի առանց կրակոցի, քանի որ լայնամասշտաբ պատերազմ, որի հավանականությունը դեռ կա, ոչ ոքի պետք չէ, այդ թվում Հայաստանի Հանրապետությանը»,- եզրափակեց Թորոսյանը:

Աղբյուր` Փաստինֆո