Փաստ ինֆո

Պարոն Բիշարյան, կամ դու ես խելքից թոփալ, կամ մեզ ես դեբլիլի տեղ դրել։ Այսինքն՝ դու որոշում ես, որ ավելի լավ է, որ այդ մարմինները լինեն պադվալում թափած՝ իրար վրա, քան, եթե տանեիք Մարտունիում նորմալ սառնարաններում դնեի՞ք։ Դու հասկանու՞մ ես ինչ ես ասում։ Այս մասին ֆեյսբուքյան ուղիղ եթերում ասել է զոհված զինծառայողի հարազատ Արսեն Ղուկասյանը՝ անդրադառնալով Դատաբժշկական կենտրոնի տնօրեն Մհեր Բիշարյանի պնդումներին, թե մարմինները բերվել են Աբովյանի դիահերձարան, քանի որ մտածել են ծնողների մասին, որ ծնողները դժվարություն չունենան՝ հասնել Մարտունիի դիահերձարան։ 

Ղուկասյանը հայտարարեց, որ Աբովյանի դիահերձարանում եղել է 46 մարմին, որից 21-ը բերվել է մայիսի 28-ին, իսկ մյուսների վերաբերյալ տեղեկություն չունի։ Այդ ամենն արձանագրվել է՝ դիահերձարանի տեսագրող սարքերի ձայնագրությունները նայելով, թե երբ է բերվել, քանիսն է բերվել և ինչ ձևով է բերվել։

Վերջինս հայտնեց, որ Բիշարյանի խոսքերում տրամաբանություն չկար, ավելի լավ կլիներ՝ երեխաներին տեղափոխեին Մարտունիի սառնարան, տեսնեին, որ մաքուր, կոկիկ դրված են մարմինները՝ նշելով, որ Մեծամորի, Մարտունիի, Գորիսի դիահերձարաններում իրավիճակը նորմալ էր, մաքուր, կոկիկ տեղադրված էր, թեև, նախկինում որոշ բացթողումներ են եղել՝ Կապանում, Մեծամորում, որոնք շտկվել են։

«Բայց հիմա, որ արածը չեք ընդունում և ամեն կերպ ուզում եք ձեզ արդարացնել՝ դա չի լինելու»,- նշեց Ղուկասյանը՝ հավելելով, որ քրեական գործը պետք է հարուցվի ոչ միայն Աբովյանի դիահերձարանի տնօրենի վերաբերյալ, այլև՝ ամբողջ անձնակազմի դեմ, այն բոլոր անձանց, որոնք տեսել են, թե ինչ է արվում, բայց չի բարձրաձայնել։

Ինչ վերաբերում է տեսանյութին, համաձայն որի՝ զոհված զինծառայողների մարմինները բեռնաթափում են, Ղուկասյանը նշեց. «Այ անողնաշարներ, եթե ես այդ ամենը տեսնեի, ես հենց տեղում դրանց վիզը կպոկեի։ Այդ նյութերը վերցվել են դիահերձարանի տեսաձայնագրող սարքերի նկարահանումից։ Մենք այնտեղ գնացել ենք մայիսի 31-ին, մարմինները բերվել է մայիսի 28-ին։ 21 մարմին է բերվել և տեղավորվել է այդ պադվալում»։

Արսեն Ղուկասյանը նաև անդրադարձ կատարեց ամերիկահայ բլոգեր Քրիստինեի ուղիղ եթերին՝ նշելով, որ եթե վերջինս չի տիրապետում տեղեկատվությանը կամ խեղաթյուրված ինֆորմացիայի հիման վրա է ուղիղ եթերներ իրականացնում, ապա ավելի լավ է չանի։

«Դու գումարներից ես խոսում, թվերդ սաղ սխալ ես ասում։ Կարող եմ քեզ հատ-հատ թվերն էլ ասեմ։ Զոհված տղերքի համար սկզբնական վճարվում է 700.000 հուղարկավորության ծախսերի համար, որից հետո մտնում է հիմնադրամ։ 70 մլն է տրամադրվում մեկ անձի համար, որի 10 մլն տրվում է միանվագ, մնացած 60 մլն բաժանվում է 20 տարվա մեջ։ Եթե հուղարկավորությունը կատարվում է Եռաբլուրում, պետությունը վերցնում է իր վրա ծախսերը՝ գերեզմանը սարքելու, իսկ եթե չէ, դու տանում ես քո գերեզմանատանն ես սարքում, դրա համար ևս 1 մլն 400 հազար տրամադրում են՝ գերեզմանի բարեկարգման համար։ Իմացիր թվերը նոր խոսա, թե չէ անկապ-անկապ թվեր ես ասում »,,- նշեց Ղուկասյանը՝ ընդգծելով, որ պատրաստ են իրենց հատկացված գումարները տալ բլոգերին, բայց փոխարենը վերջինս պետք է տա իր զոհված եղբորը և իր զոհված եղբոր անհետ կորած որդուն։

«Ինձ էդ փողերը պետք չեն, ինձ իրենք են պետք։ Ամբողջը քեզ եմ տալիս, բեր իմ ախպորն ինձ տուր»,- նշեց Ղուկասյանը՝ հավելելով, որ թքած ունի այդ փողերի վրա, իրենք իրենց մեռելին աճուրդի չեն հանում, որ իրենց փող տան, իրենք էլ լռեն։

Մանրամասները՝ տեսանյութում

Աղբյուր` Փաստինֆո