Փաստ ինֆո

Ներկայիս ժամանակավոր իշխանությունը կառավարության որոշումներով ընտրակաշառք է բաժանում։ Ինչպե՞ս է ստացվում, որ Սյունիքի, Գեղարքունիքի մարզի համապատասխան համայնքների, գյուղատնտեսական կազմակերպություններին, ֆերմաներին 2020 թվականին պետական սուբսիդիաներ չեն տրամադրվում, բայց դրանք տրամադրվում են 2021թ մայիսի 10-ից հետո։ Ինչպե՞ս է այդպես ստացվում։  Այս մասին հրավիրված մամուլի ասուլիսին ասաց «Հայաստան» դաշինքի ներկայացուցիչ Արամ Վարդևանյանը։ 

Վարդևանյանի դիտարկմամբ՝ իշխանություններն ընտրությունների փուլում ունեն պարտականություն՝ հավասարություն և օրինականություն ապահովելու։ Նախորդ տարիներին ԵԱՀԿ ԺՀՄԻԳ-ը և Վենետիկի հանձնաժողովը շատ հստակ պահանջ է դրել իշխանությունների առջև, որ նախընտրական շրջանում ամեն կերպ զերծ մնան խոստումներ և գործողություններ կատարելուց, որոնք կարող են որևէ կապ ունենալ ընտրական պրոցեսի հետ։ Վարդևանյանը մեջբերեց պաշտոնական աղբյուրներով  հրապարակված տեղեկատվությունը, համաձայն որի՝ Սյունիքի Շիկահող, Խդրալ, Սրաշեն գյուղերին տրամադրվել են  մոտոբլոկներ և խոտհնձիչներ, ապա ընդգծեց, որ  հարց է առաջանում, թե ինչու նախկինում չէր տրամադրվում, ինչու է դա տեղի ունենում հունիս ամսին։ Վարդևանյանը ԵԱՀԿ ԺՀՄԻԳ-ի ուշադրությունը հրավիրեց այդ հանգամանքի վրա։ Ինչ վերաբերում է սպառնալիքների մասին հայտարարություններին, ապա Վարդևանյանը նշեց, թե արդյոք այդ նույն հարցադրումը տրվել է այն անձին, որն, օրինակ, հանրահավաքի ժամանակ խոսում է բերաններ կոտրելու, ասֆալտին փռելու մասին, ընդ որում՝ դա անում է նախընտրական քարոզարշավի ընթացքում։

«Վարչապետի պաշտոնը զբաղեցնողը խոսում է ատամներ կոտրելու, բերաններ ջարդելու մասին։  Իսկապես սպառնալիքի տեսանկյունից առնվազն հնչեցվածի առնչությամբ արդյոք նման հարցադրում արվել է իրեն կամ իր թիմակիցներին»,- նշեց Վարդևանյանը։

Աղբյուր` Փաստինֆո