Փաստ ինֆո

5 մ² մակերեսը գերազանցող պաստառները կարող են փակցվել նախապես բաշխված վահանակների վրա։ Վահանակների բաշխումն իրականացվեց, սակայն մինչ այդ կային թե՛ Երևան քաղաքում, թե Հանրապետության մյուս քաղաքներում, միջպետական ճանապարհներին փակցված տարաբնույթ պաստառներ, որոնց վերաբերյալ նախ հանդես եկանք հրապարակային հայտարարությամբ՝ ներկայացնելով օրենքի պահանջները, որ բոլոր այն պաստառները, որոնք կճանաչվեն ասոցացվող նախընտրական քարոզչության հետ, Ընտրական օրենսգրքի պահանջների համաձայն՝ ենթակա են հանման, քանի որ այդ պաստառները կարող են լինել միայն նախապես բաշխված վահանակներում։ Այս մասին լրագրողների հետ զրույցում ասաց ԿԸՀ նախագահ Տիգրան Մուկուչյանը։ 

«Այդ կապակցությամբ ԿԸՀ-ն ստացել էր տարբեր էսքիզներ և այդ բոլոր էսքիզների հետ կապված կայացրել էր առանձին որոշումներ՝ գտնելով, որ դրանք հարամվում են ասոցացվող նախընտրական քարոզչության հետ կապված»,- նշեց Մուկուչյանը՝ հավելելով, որ 5 մ² մակերեսը գերազանցող ինչպիսի պաստառներ կարողացել են հայտնաբերել, որոնք ասոցացվում են, դրանց վերաբերյալ եղել է կարծիք։
Հարցին՝ արդյոք միայն Ռոբերտ Քոչարյանի վերաբերյալ է եղել նշված էսքիզները, Մուկուչյանը պատասխանեց՝ նշելով, որ որոշումներ են կայացվել «Լուսավոր Հայաստան» կուսակցության պաստառների, «5165» կուսակցության հետ կապված, Տիգրան Արզաքանցյանի պաստառների վերաբերյալ։

Մուկուչյանը նշեց, որ հնարավոր է լինեն այլ վահանակներ, որոնք շրջայցերով հնարավոր չի եղել հայտնաբերել, սակայն վստահեցրեց, որ ցանկացած նման դեպք հայտնաբերելու դեպքում դրանք կդառնան քննարկման առարկա։ Նրա խոսքով՝ որոշումները կայացվել են առանձին որոշումների տեսքով, որովհետև ԿԸՀ գործառույթը դրանք ասոցացվող ճանաչելուն է վերաբերում։

«Այսինքն, եթե դրանք ճանաչվում են ասոցացվող, հետագայում արդեն տեղական ինքնակառավարման մարմինները քարոզարշավի մեկնարկին պետք է հանեն հիշյալ պաստառները»,- նշեց Մուկուչյանը՝հավելելով, որ կապ չունի, թե երբ են տեղադրված եղել պաստառները։
Մուկուչյանը հայտնեց, որ ԿԸՀ-ն երեկ ստացել է Ռոբերտ Քոչարյանի կողմից ներկայացված հայցադիմումի, պատասխանը գրավոր կարգով արդեն ներկայացվել է դատարան և պահանջել են գործի նյութերը։

Աղբյուր` Փաստինֆո