Փաստ ինֆո

Նահատակված, անհետ կորած զինծառայողների աճյունների սահմռկեցուցիչ կադրեր են հրապարակել Աբովյանի դիահերձարանից, որտեղ երևում է, թե ինչ անմխիթար պայմաններում են պահվել մեր հայորդիների մարմինները:

ՈՒղիղ եթերում անհետ կորած զինվորի հարազատ Արսեն Ղուկասյանը հայտարարել է, որ զոհված զինվորների մարմինները պահվել են «մորգի երկրորդ հարկում` առանց պատուհանների սենյակում», հանել են ու այնտեղ շարել են:

Նշենք, որ նախօրեին անհետ կորած զինվորների ծնողները Աբովյան քաղաքի դիահերձարանում հայտնաբերել էին պատերազմում զոհված զինվորների մարմինները՝ պարկերի մեջ: Համացանցում հրապարակվել էին լուսանկարներ` Աբովյանի դիահերձարանից` հատակին պարկերով շարված մարմինների կադրերը:

Առողջապահության նախարարությունը հաստատել էր կադրերի իսկությունը` պարզաբանելով, թե, իբր, պայմանները համապատասխանել են պայմաններին, ապա նաեւ ներողություն խնդրել: ԱՆ նախարար Անահիտ Ավանեսյանն էլ ներողություն էր խնդրել զինվորների հարազատներից «բացթողման» համար: Անհետ կորած զինվորի հարազատ Արսեն Ղուկասյանը, արձագանքելով նախարարի հայտարարությանը` նշել էր, որ նախարարը ստում է, մարմինների պահման պայմանները չեն համապատասխանել անհրաժեշտ չափանիշներին` պահանջելով հերքել իրենց իսկ տարածած կեղծ տեղեկությունը` հակառակ պարագայուն կհրապարակեն կադրերը:

ԱՆ-ն այդպես էլ չարձագանքեց ծնողների հայտարարությանը ու երեկ երեկոյան համացանցում հրապարակվել են ահասարսուռ կադրերը:

Արսեն Ղուկասյանը ֆեյսբուքյան ուղիղ եթերում հայտարարեց, որ ինքը սրա մասին նախապես տեղյակ է եղել, սակայն այսքան ժամանակ զոհվածների հարազատներին խղճալով չի ասել.

«Մենք, որ Ստեփանակերտում էինք, ծնողներից մեկն ասեց՝ Արսեն ջան, այս մարդիկ լրիվ սրբապիղծ են, սառնարանում տեղ չի եղել, զոհվածներին հանել են մորգի երկրորդ հարկում, առանց պատուհանների սենյակում ու տղերքին շարել են այդտեղ: Ժողովուրդն ասում էր, որ չէին կարում մորգի շենքին մոտենալ հոտի պատճառով: Ներող կլինեք, մայրեր, քույրեր, որ չեմ ասել: Երկրորդը, որ ծնողը գնացել է Մեծամորի մորգից հանել են, պարկը, բացել են, տեսել են, ամբողջությամբ որդ էր, էլի չեմ ասել: Մերեր, ես ձեզ եմ խղճացել, բան չեմ աել, դե վաղը առավոտյան կգնաք Հերացի ու գլխավոր դատաբժշկից պատասխան կուզեք: Ոնց որ այս շիլաշփոթը սարքեցին, թող տենց էլ տակից դուրս գան»,- ասաց Արսեն Ղուկասյանը:

Աղբյուր` Փաստինֆո