Փաստ ինֆո

Նիկոլ Փաշինյանի միակ նպատակը տարբեր միջոցներով սեփական իշխանությունը պահպանելն է, որը, սակայն, իրեն չի հաջողվի: Դա հնարավոր կլինի միայն մի դեպքում, երբ նրա մրցակիցները որևիցե քարոզարշավ չանեն, բայց տեսնում ենք, որ ընդդիմադիր հիմնական ուժերը բավականին ակտիվ քարոզարշավ են անցկացնում: «Փաստինֆո»-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով Հայաստանում տեղի ունեցող իրադարձություններին և առաջիկա ընտրություններին.

«Նիկոլ Փաշինյանն իր իշխանությունը վերարտադրելու համար կանգ չի առնում որևէ բանի առջև, լինի դա քարոզ, գոռգոռոց, թե իր շրջագայությունները Փարիզ և Բելգիա, կամ զոհված զինվորների մասունքները տոպրակների մեջ նկուղում պահելը: Ցանկացած միջոցառում, որը կարող է իրեն խանգարել վերարտադրվելու համար փորձում է թաքցնել, իսկ ցանկացած միջոցառում, որը կարող է իր համար ձայն բերել, նա մաքսիմալ օգտագործում է դա՝ ոչնչի առջև կանգ չառնելով»,-ասաց Արմեն Բադալյանը:

Խոսելով ընտրակեղծարարությունների հավանականության մասին՝ փորձագետը նկատեց, որ գործող իշխանությունը չի տիրապետում դրա համար անհրաժեշտ միջոցներին.

«Դրա համար պետք է բարդ տեխնոլոգիաների և ֆինանսական միջոցների տիրապետել, կազմակերպչական բարձր ունակություններ ունենալ, ինչն իրենք չունեն: Երկրորդ՝ եթե նախկինում ընտրակեղծիք էին անում, գիտեին, որ դիմացը թույլ ընդդիմություն է, որը լավագույն դեպքում ԱԺ-ում մի քանի մանդատ կստանա, իսկ հիմա ընտրակեղծիք անողը պետք է հասկանա, որ ուժեղ ընդդիմություն է»,-ասաց Արմեն Բադալյանը:

Նիկոլ Փաշինյանի՝ 60% ձայնի ակնկալիք ունենալու վերաբերյալ հայտարարությունները փորձագետը որակեց PR կոմպանիա և ընդգծեց, որ դա որևէ հիմնավորում չունի.

«Ընտրություններին մասնակցող ուժերի մեջ 4 հիմնական ազդեցիկ ուժ կա՝ «Հայաստան» դաշինք, «Քաղաքացիական պայմանագիր», «Պատիվ ունեմ» դաշինք և «Բարգավաճ Հայաստան», ընդդիմադիր երեք հիմնական ուժերը երբ անցնեն խորհրդարան, նրանցիցի որևէ մեկը ՔՊ-ի հետ չի պատրաստվում դաշինք կնքել, իսկ ՔՊ-ն չունի այն վարկանիշը, որ ավելի շատ ձայն հավաքի, քան այդ երեք ուժերը միասին վերցրած: Այդ պատճառով էլ նա կարող է հայտարարել, թե ակնկալում է 60 կամ 80 % ձայն, բայց դրանք լուրջ պետք չէ ընդունել, ընդամենը PR կոմպանիա է և վերջ»,-ասաց Բադալյանը:

Հարցին՝ արդյո՞ք սա կարող է դիտարկվել որպես ընտրախախտումների ուղիղ հրահանգ, քաղտեխնոլոգն ասաց.

«Պետք չէ այս հայտարարությունն ընդունել որպես ուղենիշ՝ ընտրությունները կեղծելու համար, որովհետև ինքն անգամ կեղծիքով չի կարող այդքան տոկոս ձայն ապահովել: Նա չի կարող խորհրդարանում ունենալ ընտրության մասնակիցների կեսից ավելի ձայն»,-ասաց Արմեն Բադալյանը:

Քաղտեխնոլոգը նկատեց, որ Նիկոլ Փաշինյանն իր քարոզարշավի ընթացքում առաջ է քաշում միայն նախկիններին մեղադրելու թեզը.«Այս երեք տարվա ընթացքում նա առաջնորդվել է հետևյալ սկզբունքով՝ մեղավոր են բոլորը, բացի իրենից, անգամ պարզվեց, որ սարի վրայի ձյունն է մեղավոր, ու այդ սարի պատճառով նա հո չի՞ պատերազմելու Ադրբեջանի դեմ: Նախկինների թեման եթե աշխատում էր 2018թ-ին և դրանից հետո որոշ ժամանակ, հիմա այլևս չի աշխատում, որոշ դեպքերում նախկինների հանդեպ վերաբերմունքն էականորեն փոխվում է դրանից, դա է ցույց տալիս նաև նախկինների վարկանիշի վերաբերյալ տվյալները»,-ասաց Բադալյանը:

Անդրադառնալով ԱԳ նախկին նախարար Արա Այվազյանի հայտարարությանը, որը մեկնաբանելով իր հրաժարականի պատճառները, նշել էր, որ ԱԳՆ-ն չի կարող համաձայնություն տալ հակապետական որևէ գաղափարների, փորձագետը նշեց, որ նախկին նախարարը տողատակերով հայտարարություններ անելուց բացի, պետք է հստակ պարզաբանումներ տար.

«ԱԳ նախարարը հայտարարության տողատակերում ասաց, որ դեմ է վարվող քաղաքականությանը, և գործող վարչապետն անվտանգային խնդիրներ է ստեղծում Հայաստանի համար, բայց ավելի լավ կլիներ, որ Արա Այվազյանը հրապարակային ներկայացներ խնդիրը, բաց տեքստով գրեր դրա մասին, այլ ոչ թե տողատակերով ինչ-որ բաներ գրեր և սուս-փուս հեռանար՝ փորձելով դուռը շրխկացնելու տպավորություն թողնել, պետք է հստակ ներկայացներ ի՞նչն է վտանգ ներկայացնում »,-ասաց զրուցակիցը:

Աղբյուր` Փաստինֆո