Փաստ ինֆո

Այսօր նախատեսված է տաշի-տուշի։ Ընդ որում՝ ամենամեծ սրբապղծությունն այն է, որ դա արվելու է երեխաների ձեռքերով։ Հրեշը, չարքը հենց այդպես էլ գործում է։ Չարիքը գործում է ամենամաքուրի ձեռքերով, դա իրեն ավելի մեծ խինդ, ավելի մեծ բերկրանք է պատճառում։ Այս մասին լրագրողների հետ զրույցում ասաց զոհված զինվորի հայր Գեղամ Նազարյանը՝ հավելելով, որ հասկանալի կլիներ, եթե համերգի ժամանակ հնչեր Առնո Բաբաջանյանի «Հերոսական բալլադը»։

Ինչպես արդեն տեղեկացրել ենք՝ Հանրապետության Հրապարակում նախատեսված է համերգ՝ երեխաների պաշտպանության միջազգային օրվա կապակցությամբ՝ ժամը 21-ին։

«Մտածել են՝ ինչ անենք, համերգը լավ է իրենց համար։ Մենք ավելի կոչնչացնենք, կստորացնենք հայ ժողովրդին, կասենք՝ տեսեք, դուք ինչ ստոր ժողովուրդ եք, ձեր տղերքը գերի են Բաքվում, ունեք 5000-ից ավելի զոհ, դուք համերգ եք գալի։ Ընդամենը երեկ Աբովյանում տեսաք, թե ինչ աննկարագրելի պայմաններում են մեր տղերքի մարմինները գցված, նետված։ Ասում է՝ այդքանից հետո, 11.000 վիրավորից հետո, 40.000 անտուն մարդկանց առկայությամբ դուք համերգ եկող ժողովուրդ եք։ Նա ուզում է աշխարհին, Թուրքիային ասել՝ տեսեք ոնց եմ ստորացնում, ձեր հանձնարարականներն ինչ լավ եմ կատարում, բերեցի համերգի, հիմա դուք միշտ կարող եք մեր երեսին շփացնել, որ դուք էդ ժողովուրդն եք։ Էլ ինչ Ցեղասպանությունից եք խոսում, ընդամենը մեկ օր առաջ տեսել եք ձեր զինվորի հետ ինչպես են վարվում ու դուք եկել եք համերգի »,- հայտարարել է Նազարյանը՝ հավելելով, որ շահարկվում է, թե մի խումբ ծնողներ պատրաստվում են խանգարել երեխաների համար համերգը։

«Բա մեր երեխեքը երեխեք չէի՞ն։ Դպրոցի վերջին զանգից գնացին ուղիղ պատերազմ, ընդ որում՝ գնացին մի պատերազմ, որը ծուղակ էր ընդամենը»,- ընդգծել է Նազարյանը։

Նրա խոսքերով՝ եկել է Հանրապետության Հրապարակ՝ տեսնելու, թե քանի մարդ դեռ չգիտի, որ մենք Շուշի ենք կորցրել, ունենք 11.000 վիրավոր, որոնցից շատերը հաշմանդամ և այդ երեխեքից շատերը երազում են կյանքին վերջ տալու մասին, ունենք 40.000 անտուն մարդ, որոնք Հադրութից, Շուշիից, Բերձորից, Քարվաճառից մի տականքի պատճառով եկել պտտվում են այստեղ ու չգիտեն, թե ինչ անեն, մեր կողքին ապրում է 10.000 ավելի ծնող, որոնք նոր են հուղարկավորել իրենց 18-20 տարեկան զավակներին, ունենք երիտասարդ կանայք, որոնք նոր են հուղարկավորել իրենց ամուսիններին։

«Իրենց ի՞նչ, ուզում են խելագարեցնեն։ Այս համերգի կազմակերպիչներին, խնդրում եմ, գտեք և հարցրեք՝ ինչը ձեզ դրդեց, դուք ո՞վ եք՝ մարդ եք, հրեշ եք, սատանայի ներկայացուցիչն եք, ինչը ձեզ ստիպեց, ով ձեզ հանձնարարեց նման համերգ կազմակերպել, անունն էլ դնել՝ երեխաների համար համերգ»,- նշեց Նազարյանը՝ հավելելով, որ այս ամենին քիչ է մնացել՝ մինչև հունիսի 20-ը։

Մանրամասները՝ տեսանյութում

Աղբյուր` Փաստինֆո