Փաստ ինֆո

Նիկոլ Փաշինյանը վաղուց չի կարողանում զբաղվել երկրի առջև ծառացած խնդիրներով,վերջին շրջանում դա առավել ակնհայտ է դարձել: «Փաստինֆո»-ի հետ զրույցում ասաց քաղտեխնոլոգ Կարեն Քոչարյանը:

Նկատենք, որ վերջին շրջանում Նիկոլ Փաշինյանը այցելում է ՔՊ երևանյան և մարզային գրասենյակներ, հանդիպում համակիրների հետ, մինչդեռ հակառակորդի զինվորականները արդեն շուրջ երեք շաբաթ է գտնվում են ՀՀ սուվերեն տարածքում, ահաբեկում սահմանամերձ գյուղերի բնակիչներին, գերեվարում հայ զինվորների: Ավելին՝ ունենք նաեւ մեկ զոհ։

Հարցին՝ ստեղծված իրավիճակում ինչպե՞ս է գնահատում Փաշինյանի քարոզարշավը, քաղաքագետն ասաց.

«Փաշինյանի պարագայում դա նորմալ է, իսկ ինքն ուրիշ ի՞նչ է կարողանում անել, միայն կարողանում է ընդդիմադիր գործունեությամբ զբաղվել՝ ճվճվալ, ոստիկանների ուղեկցությամբ ման գալ, ուրիշ ոչինչ չի կարողանում անի այդ մարդը»,-ասաց Կարեն Քոչարյանը:

Քաղտեխնոլոգի խոսքով՝ Նիկոլ Փաշինյանը վաղուց չի կարողանում զբաղվել երկրի առջև ծառացած խնդիրներով.

«Վերջին շրջանում դա ավելի ակնհայտ է դարձել: Հայաստանում ոլոր կառույցներն առանձին-առանձին են գործունեություն ծավալում՝ ՊՆ-ն առանձին, ԱԳՆ-ն առանձին, Կառավարությունն առանձին, ԱԱԾ-ն առանձին, այդ կառույցները մեկը մյուսի հետ կապ չունեն, ով ինչ ուզում անում է, հայտարարում է»,-ասաց Քոչարյանը:

Նիկոլ Փաշինյանը քաղաքացիների հետ հանդիպումների ժամանակ հայտարարում է, որ ինքն ակնկալում է ստանալ ընտրողների 60 % ձայնը:

Դիտարկմանը՝ արդյո՞ք սա ուղիղ ցուցում չէ ընտրախախտումների համար՝ Կ. Քոչարյանը համոզմունք հայտնեց, որ Նիկոլ Փաշինյանը չի կարողանալու կեղծել ընտրությունները.

«Ինքը շատ կուզենար ընտրախախտումներ անել, բայց, քանի որ առհասարակ ոչ մի բան անել չի կարողանում, դա էլ չի կարողանալու անել: Ես կարծում եմ, Փաշինյանն իրականությունից կտրված է,իրեն թվում է, թե 2018թ-ի ձայներն ունի, դեռ էյֆորիայից դուրս չի եկել, եթե մի մարդ ասում է, որ հպարտ է պարտությամբ, էլ ինչի՞ մասին է խոսքը»,-ասաց զրուցակիցը և վստահեցրեց, որ ՔՊ-ն իր ակնկալած ձայները չի հավաքելու.

«Այդքան ձայն կհավաքեն միայն մի դեպքում, եթե ինչ-որ կերպ ստացվի թվեր նկարեն, բայց այդ դեպքում էլ չեն մարսի»,-ասաց Կարեն Քոչարյանը:

Քաղաքագետը նկատեց, որ արդեն վեց ամիս է՝ հակառակորդ երկրի ղեկավարը տարբեր վիրավորական արտահայտություններ է անում մեր երկրի ղեկավարի հասցեին, սակայն Նիկոլ Փաշինյանը որևէ կերպ չի արձագանքում դրանց.

«6 ամիս անընդհատ հակառակորդը մինչև վերջ ստորացնում, նսեմացնում է իրեն, բայց ես իր կողմից պատասխան չեն լսել ու այս մարդը դեռ խոսում է «տղամարդլամիշությունից»»,-ասաց Քոչարյանը:

Նա անդրադարձավ նաև ԱԳ նախկին նախարարի հայտարարությանը, ըստ որի՝ ԱԳՆ-ն չի կարող ինչ-որ քայլ անել կամ համաձայնություն տալ ինչ-որ գաղափարների, նախաձեռնությունների, որոնք մեր պետականության, մեր ազգային և պետական շահի դեմ են եղել.

«Արա Այվազյանը պետք է փակագծեր բացի: Հայաստանում ԱԳՆ-ն և Կառավարությունը զուգահեռ աշխատող կառույցներ են, իրար հետ կապ չունեն վաղուց»,-ասաց Կարեն Քոչարյանը:

Աղբյուր` Փաստինֆո