Փաստ ինֆո

Ստացիոնար բուժհիմնարկներից նախապես կներկայացվեն ցուցակներ, որոնց հիման վրա տեղամասային ընտրական հանձնաժողովները սահմանված կարգով շրջիկ արկղեր կտանեն։ Լրագրողների հետ զրույցի ժամանակ այս մասին ասաց Կենտրոնական ընտրական հանձնաժողովի նախագահ Տիգրան Մուկուչյանը՝ անդրադառնալով կորոնավիրուսով վարակվածների՝ ընտրությանը մասնակցելու գործընթացին։

ԿԸՀ նախագահը նշեց, որ քվեարկության կարգը կլինի այնպես, ինչպես միշտ է եղել՝ շրջիկ արկղերի միջոցով. «Շրջիկ արկղեր տարվում են բացառապես ստացիոնար բուժհաստատություններ։ Ընտրական օրենսգիրքը տանը քվեարկել չի նախատեսում»,-նշեց Տիգրան Մուկուչյանը։
Անդրադառնալով արտահերթ խորհրդարանական ընտրություններին մասնակցող 26 քաղաքական ուժերին, Տիգրան Մուկուչյանը նշեց, որ 2012 թվականից չի հիշում նման մեծ մասնակցություն։

«Մասնակցության առումով եթե նայում ենք 2012 թվականից սկսած նման մեծ թվով ընտրություններին մասնակցություն չէր եղել։ Մինչ այդ կդժվարանամ հստակ դատողություն անել»,-ասաց ԿԸՀ նախագահը։

Անդրադառնալով ընտրությունների հետ կապված ծախսերին՝ Տիգրան Մուկուչյանը նշեց, որ հիմա իրականացվում է հաշվարկ և հիմնական ծախսի ավելացումը պայմանավորված է լինելու քվեաթերթիկների տպագրությամբ, դրանց տեղափոխմամբ։

«Նախապես պլանավորվում էր ավելի քիչ մասնակցության թիվ, իսկ մեր ԸՕ-ն այնպիսին է, որ յուրաքանչյուր կուսակցության համար պետք է տպագրվի առանձին քվեաթերթիկ։ Նշանակում է՝ մենք տեղամասային կենտրոններում ունենալու ենք կուսակցությունների և դաշինքների թվին հավասար քվեաթերթիկ։ Լինելու են առանձին քվեաթերթիկներ, ընտրողը ստանալու է դրանք, ընտրելու է իր նախընտրած կուսակցության կամ դաշինքի քվեաթերթիկը, այն տեղադրելու է ծրարի մեջ, իսկ մնացածը գցելու է արկղի մեջ»,-նշեց Տիգրան Մուկուչյանը։

Աղբյուր` Փաստինֆո