Փաստ ինֆո

«Ռուս խաղաղապահները դրոշներով եկել էին, մի քամի ժամ մնացին ու գնացին։ Խոշորացված համայնքի ղեկավարի հետ էին։ Մեզ ոչինչ չասեցին, ասացին միայն, որ սահմանների համար են եկել, բայց ավելին ոչինչ չիմացանք,- ասում է Գեղարքունիքի մարզի Կութ համայնքի վարչական ղեկավար Սիմա Չիթչյանը, «Փաստինֆո»-ի հետ զրույցում անդրադառնալով գյուղում ստեղծված պայթունավտանգ իրավիճակին և հավելում, - գյուղի բնականոն կյանքը խաթարվել է՝ վախենում ենք անասունին հանդ տանել։ Ամեն մեկն իր տնամերձում է արածեցնում անասուններին։ Բնակիչները վախեցած են, բայց դեռևս խուճապահար չեն։ Նոր - նոր կարտոֆիլ ենք ցանել, խոտհունձի ժամանակը որ եկավ, չգիտենց ինչ ենք անելու»,- պատմում է գյուղապետը։ 

Հիշեցնենք, որ մի քանի օր առաջ, այն բանից հետո, երբ թշնամու կողմից թվով վեցը զինվորական գերեվարվեց, Գեղարքունի մարզի Կութ համայնք էր այցելել ՀՀ-ում վարչապետի ժամանակավոր պաշտոնակատար աշխատող Նիկոլ Փաշինյանը։

«Փաստինֆո»-ի հետ զրույցում գյուղապետ Սիմա Չիթչյանը թերահավատորեն է պատմում վերոհիշյալ անձի այցելության մանրամասների մասին. «Թուրքը եկել նստել է սարերի վրա, վարչապետն ասում է հանգիստ եղեք, հարցերը կլուծվի։ Նույնը նաև վերջին օրերին գերի ընկած զինվորականների մասին ասաց՝ կվերադարձնենք։ Եթե այսպես շարունակվի, չգիտենք ինչ ենք անելու, ինչ է լինելու մեր վիճակը», - պատմում է գյուղապետը։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո