Փաստ ինֆո

Երևանի ընդհանուր իրավասության դատարանի դատավոր Վարդան Լևոնի Գրիգորյանին կարգապահական պատասխանատվության ենթարկելու վերաբերյալ միջնորդությունն այսօր չի քննվել։ Վարդան Գրիգորյանի փաստաբան Միքայել Շխիմյանը «Փաստինֆո»-ի հարցին ի պատասխան հայտնեց, որ ԲԴԽ նիստը հետաձգելու դիմում է ներկայացրել ԲԴԽ՝ վարույթի հիմքում ընկած նյութերին պատշաճ կերպով ծանոթանալու համար։

Հիշեցնենք, որ ՀՀ արդարադատության նախարարի պաշտոնակատար Ռուստամ Բադասյանի կողմից Երևանի ընդհանուր իրավասության դատարանի դատավոր Վարդան Գրիգորյանի նկատմամբ կարգապահական վարույթ է հարուցվել՝ ՀՀ գլխավոր դատախազ Արթուր Դավթյանի կողմից ներկայացված հաղորդման հիման վրա։ ՀՀ արդարադատության նախարարի պաշտոնակատարի կողմից 2021թ մայիսի 4-ին միջնորդություն է ներկայացվել ԲԴԽ՝ դատավորին կարգապահական պատասխանատվության ենթարկելու մասին։

Փաստաբան Միքայել Շխիմյանը «Փաստինֆո»-ի հետ զրույցում նշեց, որ վարույթը, ըստ էության, նախաձեռնվել է Դատավորի կողմից իր մասնագիտական տիրույթում, դատական ակտով արտահայտած դիրքորոշման համար, ինչը ըստ փաստաբանի՝ հանդիսանում է ուղղակի միջամտություն դատարանի անկախությանը, հատկապես այն պայմաններում, երբ մեր դատարանը եռաստիճան է և յուրաքանչյուր դեպքում վարույթն իրականացնող մարմինը համաձայն չլինելով դատարանի այս կամ այն որոշման, դիրքորոշման հետ, իրավասու է դատարանի նշված ակտը բողոքարկել վերադաս դատարան։

Նշենք, որ դատավոր Վարդան Լևոնի Գրիգորյանը համարվում է բարձր վարկանիշ ունեցող դատավորներից մեկը։ 2021թ մայիսի 31-ի դրությամբ՝ դատավորի վարկանիշը 56 միավոր է։

Հեղինակ՝ Իզաբել Սահակյան

Աղբյուր` Փաստինֆո