Փաստ ինֆո

 Տեղ համայնքի ղեկավար Ներսես Շադունցը «Փաստինֆո»-ի թղթակցի հետ զրույցում տեղեկացրեց, որ վարչական տարածքում իրավիճակը նորմալ է, տվյալ պահին սահմանապահներն ու գյուղի կամավորները բանակային կորպուսի հետ միասին հսկում են սահմանները, որպեսզի թույլ չտան ադրբեջանական կողմի սադրանքների կրկնությունը։ Թե ինչքանով կկարողնանան՝ ժամանակը ցույց կտա։

Մայիսի 20-ին՝ ժամը 10:00-ի սահմաններում, Ադրբեջանի զինված ուժերի մի խումբ զինված զինծառայողներ առանց թույլտվության հատել են Սյունիքի մարզի Տեղ համայնքի վարչական տարածքի Խոզնավար գյուղի հատվածում պահպանվող պետական սահմանը, 1,5 կմ առաջացել։ Շադունցը հիշեցրեց` կես ժամ անց տղաների հետ միասին դուրս են հանել ադրբեջանցիներին։

«Որոշները գրում են՝ ինչի՞ պատանդ չեք վերցրել, մենք հանձնարարությունը ենք կատարում, բանակային կորպուսի հրամանատարի հետ ենք համագործակցում։ Եթե հրաման կտա, հնարավորություն կունենանք դա էլ կանենք։ Հանված են, իրենց տեղում չեն։ Նույնիսկ Խոզնավար տանող ճանապարհի ցուցանակն էլ են փոխել։ Էն որ գրում էին ցուցանակը փոխեք, դա էլ է փոխվել»։

Համայնքի ղեկավարը Խոզնավարի, Վաղատուրի, Խնածախի տղամարդկանց զինել է, համայնքը ինքնապաշտպանական ջոկատ է կազմել ու հայկական կողմը ինժեներական աշխատանքներ է կատարում։ Շադունցը նշեց, որ ամեն ինչի կարիք էլ ունեն՝ եթե ցանկություն կլինի օգնելու՝ դեմ չեն։

«Որոշ մասնագետների ցուցումով ենք կատարում, որպեսզի կարողանանք հավուր պատշաճի անել աշխատանքները։ Նորմալ է, պետք չէ անհանգստանալ, պետք չէ բայց շատ արխային մնալ»։

Շադունցի փոխանցմամբ` ադրբեջանական կողմը ինժեներական աշխատանքները շարունակում  է իրականացնել, դրանք չեն էլ դադարել։
Անդրադառնալով Նիկոլ Փաշինյանի՝  զորքերը հետ քաշելու ու միջազգային դիտորդներ տեղակայելու առաջարկին,  Շադունցը տեղեկացրեց, որ այսքան ժամանակ իշխանության ներկայացուցիչների ասածով ոչինչ չի եղել՝ խաղաղություն են խոստացել, փոխարենը՝ ադրբեջանցիներն առաջացել են ՀՀ տարածք։ Խոստումն էլ տրվել է հունվարի 11-ի փաստաթուղթը ստորագրելուց մեկ օր առաջ՝ անձամբ պաշտպանության նախարարը։

«Յանի մի հատ տարածք ունենք, մի հատ էլ հետ ենք գնո՞ւմ։ Նիկոլ Փաշինյանը չգիտեմ ինչ է ասել։ Պաշտպանության նախարարին էլ մեզ մոտ էր ուղարկել հունվարի 11-ի խայտառակ փաստաթուղթը ստորագրելուց հետո։ Համայնքի ղեկավարներին համոզում էր՝ դուրս գալ, որովհետև համաձայնագրի առաջին կետը մեզ չի վերաբերում, ասում էր՝ «դուրս եկեք, չպայքարեք, թող իրենք գան իրենց բնագծերում կանգնեն՝ էլ ոչ մի կարակոց չի լինելու, այսօրվանից սկսվում է խաղաղությունը»։ Ուզում եմ հարց տալ՝ բա ո՞ւր մնաց ասածը, բա ի՞նչ եղավ։ Որ համայնքի ղեկավարներով գոռում էինք, ասում ՝ դուրս գալը հիմա ճիշտ չէ՝ ինչ եղավ։ Ինչի հիմա Ադրբեջանը հանգիստ չի մնում՝ իր բնագծում չի կանգնում։ Ես հարց եմ տալիս պաշտպանության նախարարին՝ որ մեզ համոզում էր՝ ասում, դուրս եկեք, ամեն ինչ նորմալ է»։

Շադունցը նշում է, որ թիվ մեկ խնդիրը ինքնապաշտպանության գործը պետք է լինի, ոչ թե օրինակ՝ նախընտրական շտաբ բացելու հարցերը։ Միայն մեկ շտաբ կարող է բացվել Տեղ համայքնում, այն էլ՝ ինքնապաշտպանության համար, մուտքն էլ բոլորի համար ազատ է։

Դիտարկմանը՝ ինչպես է իրականացվելու հայկական զորքերի հետ քաշվելու ընթացքը և օտարերկրյա դիտորդների  տեղակայումը, Շադունցը նշեց, որ իրենց հողը միայն իրենք կարող են պաշտպանել.

«Կարողա ես գյուղացի տղա եմ ՝ լավ չեմ պատկերացնում, բայց իմ հողը ինձնից լավ ոչ մեկ չի պահի, ես մենակ դա գիտեմ։ 100 տարի նույն պատմությունը կրկնվում է։ Չեմ հասկանում՝ էսպես պետք է լինի՞։ Եթե գալու են թող գան, ինչո՞ւ չեն գալիս։ Խելքս էլ իմս չի, որ գնամ ամեն գիշեր մեր խեղճ ու կրակ տղերքին հավաքեմ, գնամ էս քարի, էն քարի տակ մնամ։ Անելու են, թող անեն, յոթ ամիսա խոսում են»։

Համայնքը պաշտպանող ջոկատների համար վրանների խնդիր կա։ Շադունցը պիկապների համար դիմել էր հայրենակիցներին ու պարզվեց՝ միայն գլխավոր դատախազն է «ՈՒԱԶ» մակնիշի մեքենա նվիրել, որով կատարում են պահպանության աշխատանքները, մինչև այդ էլ մեկ «Նիվա» մեքենայով էին զենքերը բարձած սահմանները հսկում։

Շադունցը նշեց, որ ժամանակին բոլորն անհանգստացած էին Արցախում տիրող իրավիճակով, շատերը պահանջում էին զավակներին ՀՀ տարածքում ծառայության ուղարկել, հիմա նույն խնդիրները նաև ՀՀ տարածքում կան։

«Ես, իհարկե,  ներողություն եմ խնդրում մեր բոլոր ծնողներից։ Նրանք հրապարակում ասում էին՝ մեր երեխաները ինչո՞ւ պետք է Արցախում ծառայեն՝ ջուր էին լցնում Ալիևի ջրաղացին, ասում թող ՀՀ-ում ծառայեն։ Եկել են... հիմա տեսեք, որ նույն Արցախը եկել հասել է մեր դռան դեմը։ Եկեք տեսեք՝ բան  չի փոխվել՝ ուղղակի 150 կմ հետ են եկել։ Ես ներողություն եմ խնդրում, մեր ծնողներին ոչինչ չեմ կարող ասել՝ բայց եկեք տեսեք։ Էնտեղ զորամաս կար սարքած, ծառայում էին՝ հիմա նոր պետք է զորամաս սարքեն՝ չգիտեն ինչ անեն»,- ասաց Տեղ համայնքի ղեկավարը։

Աղբյուր` Փաստինֆո