Փաստ ինֆո

Նիկոլ Փաշինյանը վերջին օրերին ակտիվ իրականացվող քարոզարշավով փորձում է լուծել իր շատ կարևոր խնդիր: Նրան ընտրությունները պետք են ոչ թե իր իշխանությունը վերահաստատելու, այլ՝ արցախյան պատերազմից, կրած պարտությունից, ստորագրված կապիտուլյացիայից հանրության ուշադրությունը շեղելու համար: Այս մասին «Փաստինֆո»-ի հետ զրուցում ասաց քաղաքագետ Հրանտ-Մելիք Շահնազարյանը:

Ըստ նրա` Նիկոլ Փաշինյանն իր խնդիրը լուծել է. «Արցախի թեման ոչ մեկը չի քննարկում, հիմա էլ նա փորձում է ամրապնդել այդ իրողությունը և փակված համարել Արցախի թեման Հայաստանի և հայ ժողովրդի համար»,-ասաց քաղաքագետը:

Անդրադառնալով Նիկոլ Փաշինյանի՝ Լևոն Տեր-Պետրոսյանին և Ռոբերտ Քոչարյանին արված բանավեճի առաջարկին և պնդմանը, որ նրանք պետք է բացատրություններ տան Արցախյան հարցի հետ կապված, փորձագետը նշեց, որ Փաշինյանն առաջին և երկրորդ նախագահների հետ որևէ բովանդակային քննարկման պատրաստ չէ. «Փաշինյանը շատ մեղքեր է փորձում բարդել նախկին բոլոր իշխանությունների վրա: Քարոզարշավի վերջում ընտրություններին մասնակից քաղաքական ուժերի ղեկավարների մասնակցությամբ բանավեճը պարտադիր է, բայց չեն կարծում Փաշինյանը պատրաստ է որևէ մեկի հետ բովանդակային քննարկման, էլ չեմ ասում՝ առաջին և երկրորդ նախագահների հետ»,-ասաց Շահնազարյանը:

Դիտարկմանը, որ Նիկոլ Փաշինյանը հանդիպումների ընթացքում քաղաքացիներին հորդորում է չվախենալ սահմանագծման գործընթացից և պնդում, թե դա բխում է հայկական կողմի շահերից` քաղաքագետն արձագանքեց. սահմանին միջազգային դիտորդներ տեղակայելու Փաշինյանի առաջարկում Հայաստանի շահն իսպառ բացակայում է. «Նման առաջարկով հանդես գալը քրեական գործերի հերթական հատորներից մեկն է լինելու, որովհետև վարչապետի աթոռը զբաղեցնողն, ըստ էության, առաջարկում է հետ քաշել հայկական զորքերը ՀՀ սուվերեն տարածքից, այլ ոչ թե ադրբեջանցիներին դուրս մղել:Եթե նույն չափով, նույն քանակությամբ երկու կողմի զորքերը հետ քաշվեն, միևնույնն է, ինչ-որ հատվածներում ադրբեջանցիները շարունակելու են մնալ ՀՀ սուվերեն տարածքում, կամ սահմանագծի անմիջապես վրա են լինելու, մինչդեռ մեր զորքերը, ըստ Փաշինյանի առաջարկի, 6 կմ պետք է հետ քաշվեն»,-ասաց զրուցակիցը:

Վերջին օրերին Նիկոլ Փաշինյանը շրջանառության մեջ է մտցրել անհավանական մեծ թվեր` հայտարարելով, թե ակնկալում են ստանալ ընտրողների 60 տոկոս ձայնը: Քաղաքագետի համոզմամբ` Նիկոլ Փաշինյանը փորձելու է կեղծել ընտրության արդյունքները և դրանք ներկայացնել որպես հաղթանակ. «Ես տեսնում եմ, որ ժողովուրդն օր-օրի երես է դարձնում կապիտուլյանտից, անգամ նրանք ովքեր շատ հավատարիմ էին Փաշինյանին, նրանք էլ շատ արագ երես են դարձնում: Այս գործընթացը շարունակական է լինելու: Վստահ եմ, որ Փաշինյանը չի կարողանալու ևս մեկ անգամ խաբել ժողովրդին: Բացառում եմ, որ նա կարող է վերընտրվել, այլ հարց է, որ նա կեղծելու է ընտրությունները և ցույց է տալու հաղթանակ, իսկ թե դրանից հետո ինչպե՞ս քաղաքական էլիտաները և մեր հանրությունը կարձագանքի իշխանությունը գողանալու փաստին, ժամանակը ցույց կտա»,-եզրափակեց զրուցակիցը:

Աղբյուր` Փաստինֆո