Փաստ ինֆո

Միջազգային դիտորդների, գերտերությունների միջամտության կարիք ունենք, որովհետև եթե ադրբեջանցիներն առաջ են եկել ու շարունակում են մնալ, ուրեմն լրացուցիչ ուժի կարիք կա։ «Փաստինֆո»-ի հետ զրույցի ժամանակ ասաց Գեղամասար խոշորացված համայնքի ղեկավար Հակոբ Ավետյանը։

Համայնքապետը, անդրադառնալով Նիկոլ Փաշինյանի այն առաջարկին, որ սահմանի երկայնքով պետք է միջազգային դիտորդներ տեղակայվեն, նշեց՝ չգիտեն, թե միջազգային դիտորդներն ինչ առաքելություն են կատարելու և հիմա դա են ցանկանում հասկանալ։

«Եթե պետք է գան ուղղակի նայեն, վերջում էլ գնահատական տան ու գնան, ինձ համար դա անհասկանալի է։ Այս պահի դրությամբ մենք լրացուցիչ ուժերի կարիք ունենք, որ հարցը բանակցություններով, խաղաղ ճանապարհով լուծվի, և թուրքերը հետ շպրտվեն այդ դիրքերից»,-նշեց Հակոբ Ավետյանը։

Վերջինս ընդգծեց՝ չի ցանկանում թերագնահատել մեր զինված ուժերին, քանի որ տղաներն իսկապես ուժեղ կամք ունեն, բայց համայնքապետը հորդորում է հաշվի առնել, որ մեր բանակը պատերազմի մեջ է Թուրքիայի, այլ ոչ թե Ադրբեջանի հետ. «Մտածում եմ՝ շատ արագ, թեկուզ միջազգային ուժերի օգնությամբ այդ հարցը լուծվի ու թուրքերը հետ շպրտվեն»,-նշեց Հակոբ Ավետյանը։

Հիշեցնենք, որ ՀՀ վարչապետի պաշտոնակատար Նիկոլ Փաշինյանը երեկ հայ-ադրբեջանական սահմանին ստեղծված իրավիճակի լուծման առաջարկով էր հանդես եկել։ Նիկոլ Փաշինյանը առաջարկում է, որ երկու կողմերի զինված ստորաբաժանումները հեռանան սահմանից. «Մենք առաջարկում ենք, որ այդ տարածքներից զինված ուժերի ստորաբաժանումները վերադառնան մշտական տեղակայման վայրեր։ Դրա փոխարեն ենթադրվող սահմանագծի երկայնքով տեղակայվեն միջազգային դիտորդներ՝ Ռուսաստանը կամ ԵԱՀԿ Մինսկի խմբի համանախագահությունը ներկայացնող»,-նշել էր Նիկոլ Փաշինյանը։

Աղբյուր` Փաստինֆո