Փաստ ինֆո

Այսօրվա իրավիճակն այնպիսինն է, որ մենք ոչ միայն կարող ենք խուսափել պատերազմից, այլ այս իրավիճակը պետք է լուծվի բացառապես առանց պատերազմի: Սա իմ հստակ դիրքորոշումն է: Այս մասին քաղաքացիների հետ հանդիպման ժամանակ ասաց վարչապետի պաշտոնակատար Նիկոլ Փաշինյանը՝ անդրադառնալով հայ-ադրբեջանական սահմանին տիրող իրավիճակին.

«Ադրբեջանը եկել է, մենք էլ նրանց ասում ենք՝ պետք է դուրս գաք: Ադրբեջանն ասում է՝ ինչի՞ եք ագրեսիվ արձագանքում, մենք քարտեզ ունենք, որ սա մեր տարածքն է, մենք էլ ասում ենք՝ մենք քարտեզ ունենք, որով դա մեր տարածքն է: Խնդիրը սահմանային ճշգրտման մեջ է, մենք պարզ բան ենք ասում ՝ եկեք Սոթքից մինչև Խոզնավար զորքերը երկուստեք հետ քաշենք, տանենք մշտական տեղակայման վայրեր, թող գան միջազգային դիտորդներ և միջազգային հովանու ներքո հանենք փաստաթղթերը, տեսնենք սահմանները որտեղո՞վ են անցնում և այդ սահմանները դեմարկացիա, դելիմիտացիա անենք»,-ասաց Փաշինյանը

Փաշինյանը անդրադարձավ նաև համացանցում հրապարակված փաստաթղթին և հորդորեց քաղաքացիներին անձամբ ուսումնասիրել փաստաթուղթը.

«Ի՞նչ կա այդ թղթի մեջ, որ այդպես աղմուկ է բարձրացվում, սահմանները չպե՞տք է ճշգրտենք, աշխարհին պետք է ասենք, մենք սահման չունե՞նք: Ասում են սահմանների ճշգրտումը վտանգավոր է Ղարաբաղի հարցի համար, ի՞նչ կապ ունի Ղարաբաղի հարցը նրա հետ, թե Սև լճի տարածքում մեր սահմանը որտե՞ղով է անցնում, Ղարաբաղի հարցը որտեղ է առնչվում այս թեմայի հետ»,-ասաց Փաշինյանը:

Նրա խոսքով՝ Ադրբեջանն ու հայաստանյան որոշ ուժեր ուզում են պատերազմ հրահրել.

«Մենք համաձայն չենք դրա հետ ու չենք համաձայնվելու դրա հետ: Այսօր այն ինչ տեղի է Հայաստանում, դա ազգային-ազատագրական պայքար է հանուն պետականության, ինքնիշխանության, անկախության»,-ասաց Փաշինյանը:

Աղբյուր` Փաստինֆո