Փաստ ինֆո

Երբ քո սահմանին միջազգային դիտորդներ ես տեղակայում, դա նշանակում է, որ դու ինքդ չես ճանաչում այդ սահմանները և ընդունում ես, որ դրանք վիճելի սահմաններ են: «Փաստինֆո»-ի հետ զրույցում ասաց անվտանգության հարցերով փորձագետ Արմեն Մանվելյանը՝ անդրադառնալով Նիկոլ Փաշինյանի առաջարկին, որ Սոթք-Խոզնավար տարածքում միջազգային դիտորդներ տեղակայվեն:

Փորձագետի խոսքով՝ սրանով հայկական կողմը կասկածի տակ է դնում իր երկրի սահմանների օրինականությունը և դարձնում է դրանք վիճելի.

«Սա նշանակում է, որ մենք ինքներս կասկածի տակ ենք դնում մեր սահմանների օրինականությունը, ընդունում ենք փաստը, որ Ադրբեջանը կարող է ունենալ հավակնություններ և խնդրում ենք երրորդ կողմին, որպեսզի գա և փորձի հարց լուծել »,-ասաց Մանվելյանը և հավելեց՝ սրանով մենք ընդունում ենք, որ մեր երկրի սահմանները վիճելի են:

«Եթե բառացի ասենք, սա նշանակում է, որ մարդը ամբողջ աշխարհին ասում է, որ ինքն անդամալույծ է, և անդամալույծի կարգավիճակի է հասցրել մեր երկիրը, որը նույնիսկ չի կարողանում նույնիսկ 24 կմ-անոց սահմանային դիրքի հարց լուծել»,-ասաց զրուցակիցը

Արմեն Մանվելյանի համոզմամբ՝ անգամ միջազգային դիտորդների տեղակայումից հետո, չենք կարող ապահովագրված լինել, որ այլևս սահմանային միջադեպեր չեն արձանագրվի.

«Համաշխարհային պատմության մեջ բազմաթիվ դեպքեր են եղել, երբ նույնիսկ խաղաղապահ ուժերը չեն կարողացել զսպել զորքերի առաջ շարժվելը: Դիտորդների տեղակայումը ոչինչ չի նշանակում, սրանով ընդամենը մենք մեր պետության անդամալուծության մասին բարձրաձայնում ենք ամբողջ աշխարհով մեկ»:

Փորձագետի համար հասկանալի չէր՝ Փաշինյանը միջազգային դիտորդներ ասելով ի՞նչ նկատի ուներ, քանի որ միջազգային նման փորձ չկա, որ երկրի սահմաններին դիտորդներ տեղակայվեն։

«Նման համաշխարհային փորձ կա, երբ հակամարտության գոտիներում խաղաղապահ ուժեր են տեղակայվում, բայց չգիտեմ՝ որտեղ նման փորձ կա, որ սահմանին միջազգային դիտորդներ տեղակայվեն: Միջազգային դիտորդներ բերելու համար անհրաժեշտ է բոլոր կողմերի համաձայնությունը նաև հարկավոր է հասկանալ, ո՛վքեր են միջազգային դիտորդները՝ ԵԱՀԿ, ՄԱԿ,սա երկար գործընթաց է, որը քիչ հավանական է , որ իրականանա»,-ասաց Արմեն Մանվելյանը:

Աղբյուր` Փաստինֆո