Փաստ ինֆո

Մեր սուվերեն տարածքում ինչո՞ւ պետք է դիտորդներ տեղակայվեն, եթե կարող ենք ինքներս մեր սահմանները պաշտպանել: Այս առաջարկն ի սկզբանե ձախողված է: Այս մասին «Փաստինֆո»-ի հետ զրույցում ասաց ՊՆ նախկին նախարար, գնդապետ-գեներալ Սեյրան Օհանյանը:

Հիշեցնենք, որ երեկ Նիկոլ Փաշինյանն ԱԽ նիստին հանդես եկավ առաջարկությամբ՝ ուղղված միջազգային հանրությանը և Ադրբեջանին։Նա առաջարկել էր Սոթք-Խոզնավար տարածքում տեղակայել միջազգային դիտորդների.

«Առաջարկը հետևյալն է. մենք պայմանավորվում ենք, որ շատ արագ երկու կողմերի զինված ուժերի ստորաբաժանումները հայելային եղանակով հեռանում են սահմանից։ Այսինքն՝ սահմանի վերաբերյալ կա պատկերացում՝ 5 կմ այս կողմ, թե այն կողմ, ենթադրաբար, մենք առաջարկում ենք, որ ընդհանրապես այդ տարածքներից ԶՈՒ ստորաբաժանումները վերադառնան մշտական տեղակայման վայրեր։

Դրա փոխարեն՝ սահմանագծի երկայնքով տեղակայվում են միջազգային դիտորդներ՝ Ռուսաստանի կամ ԵԱՀԿ Մինսկի խմբի համանախագահող երկրների ներգրավվածությամբ»,- ԱԽ նիստին ասել էր Փաշինյանը ՊՆ նախկին նախարարը, անդրադառնալով առաջարկին , նշեց, որ սա ոչ մի արդյունք չի տալու, քանի որ առաջին հերթին Հայաստանն ինքը պետք է իր անվտանգությունն ապահովի.

«Յուրաքանչյուր պետություն իր երկրի սահմանները ինքը պետք է պաշտպանի: Առաջին հերթին իր ինքնիշխանության, անկախության և անկախության համար երաշխավոր հանդիսացող անվտանգության համակարգի վրա պետք է հույս դնի»,-ասաց Սեյրան Օհանյանը:

ՊՆ նախկին նախարարը նկատեց, որ այս դեպքում ստացվում է, որ հայկական կողմն իր տարածքում զորքերը ինչ-որ չափով պետք է հետ քաշի.

«Ինչու՞ պետք է սահմանից զորքերը հետ քաշենք՝ դիտորդական կամ խաղաղապահ ուժեր տեղակայելու համար: Սա արդյունք չի ունենալու, մեր երկրի սահմանները մեր բանակը պետք է պաշտպանի, մեր ղեկավարությունը պետք է քայլեր ձեռնարկի, որպեսզի մեր արժանապատվությունը բարձրացնի, բայց կարծում եմ, իրենց չի հաջողվի,որովհետև միակ ելքը մեր արժանապատվության բարձրացման համար, դա այս իշխանություններին հեռացնելն է և նոր, ավելի համարձակ, նախաձեռնող իշխանության բերելն է»,-ասաց Օհանյանը:

Ավելի վաղ Նիկոլ Փաշինյանը հայտարարել էր, որ առաջարկը փոխշահավետ է և իրականանալի կարճ ժամանակահատվածում՝ միջազգային հանրության աջակցությամբ։

Զրուցակցի խոսքով՝ ի տարբերություն Նիկոլ Փաշինյանի, որ մտածում է և՛ մեր և ՛ ադրբեջանցիների համար, ադրբեջանցիները միայն իրենց շահերի մասին են մտածում.

«Չեմ կարծում որևէ պետություն իր շահերը պետք է ստորադասի այլ երկրի շահերին և թույլ տա, որ դիտորդներ տեղակայվեն մեր սահմաններին, փոխարենը պետք է բարձրացնել բանակի մարտունակությունը, սահմանապահ ծառայության մարտունակությունը, նաև միջազգային խելացի դիվանագիտության շնորհիվ հետ շպրտել հակառակորդին»,-ասաց Սեյրան Օհանյանը:

Աղբյուր` Փաստինֆո