Փաստ ինֆո

Չգիտեմ՝ այս պարագայում ինչ է նշանակում միջազգային դիտորդ ձևակերպումը։ Տեղյակ չեմ, թե ինչպիսինն է լինելու այդ դիտորդների մանդատը։ «Փաստինֆո»-ի հետ զրույցի ժամանակ ասաց միջազգայնագետ Սուրեն Սարգսյանը՝ նկատելով, որ կա հարցերի շարք, որի պատասխանն այդ առաջարկի հեղինակը կարող է տալ։

Միջազգայնագետը գտնում է, որ որքան քիչ լինեն Հայաստանի տարածքում ներկա զինված ուժերը, խմբավորումները, դիտորդները, մոնիթորինգ իրականացնողները, այնքան ավելի լավ կլինի Հայաստանի և մեր սուվերենության համար։

«Անկեղծ ասած ուզում եմ հասկանալ, թե ինչ դիտորդների մասին է խոսք գնում, ինչի համար և ինչ նպատակով են տեղակայվելու, որ ինչի՞ն հետևեն, ադրբեջանական զորքերի տեղաշարժի՞ն։ Եթե ունենանք նորմալ, ադեկվատ զինված ուժեր, դրա անհրաժեշտությունը չի լինի։ Քանի որ այս պահին չունենք բանակ և որևէ ոլորտում արդյունավետ կառավարում, բնական է՝ հենց այդպես էլ պետք է լինի, և մեր փոխարեն ուրիշներին պետք է փորձեն ներքաշել այս գործընթացի մեջ»,-ասաց Սուրեն Սարգսյանը։

Վերջինս չի կարծում՝ շահագրգիռ կողմերը շատ կլինեն, որ գան մոնիթորինգ անեն ու տեսնեն՝ Ադրբեջանն ինչպես տեղաշարժվեց ու ինչ արեց։ Սուրեն Սարգսյանի կարծիքով ավելի ադեկվատ կլինի, եթե ինքներս կարողանանք դա անել։

Դիտարկմանը, որ Նիկոլ Փաշինյանի առաջարկի համաձայն՝ երկու կողմերի զինված ստորաբաժանումները պետք է հեռանան սահմանից, Սուրեն Սարգսյանը նկատեց՝ միգուցե խոսքը գնում է անվտանգության գոտու մասին. «Բայց ինչու՞ պետք է անվտանգության գոտին մեր տարածքի հաշվին լինի, ինձ համար դա անհասկանալի և անընդունելի է։ Ոչ մի նորմալ ու ադեկվատ լուծում չի շրջանառվում, ինչը խոսում է գաղափարների սնանկության մասին»,-նշեց միջազգայնագետը։

Հիշեցնենք, որ ՀՀ վարչապետի պաշտոնակատար Նիկոլ Փաշինյանը երեկ հայ-ադրբեջանական սահմանին ստեղծված իրավիճակի լուծման առաջարկով էր հանդես եկել։ Նիկոլ Փաշինյանը առաջարկում է, որ երկու կողմերի զինված ստորաբաժանումները հեռանան սահմանից. «Մենք առաջարկում ենք, որ այդ տարածքներից զինված ուժերի ստորաբաժանումները վերադառնան մշտական տեղակայման վայրեր։ Դրա փոխարեն ենթադրվող սահմանագծի երկայնքով տեղակայվեն միջազգային դիտորդներ՝ Ռուսաստանը կամ ԵԱՀԿ Մինսկի խմբի համանախագահությունը ներկայացնող»,-նշել էր Նիկոլ Փաշինյանը։

Աղբյուր` Փաստինֆո