Փաստ ինֆո

Տեղի ունեցող իրադարձությունները սպասելի էին։ Երբ որդեգրվում է «դիվանագիտական» ուղի, ապա հաշվի առնելով թե մենք ում հետ գործ ունենք, ապա պետք է գիտակցենք, որ հետևանքները կարող են լինել սարսափելի: Այս մասին «Փաստինֆո»-ի հետ զրույցում ասաց ԲՀԿ խմբակցության քարտուղար Արման Աբովյանը:

Նշենք, որ այսօր վաղ առավոտյան ադրբեջանցիները ներխուժել են ՀՀ տարածք եւ 6 զինվոր գերեվարել։ «Մայիսի 27-ի վաղ առավոտյան, Հայաստանի Հանրապետության Գեղարքունիքի մարզի սահմանային հատվածում, ՀՀ ԶՈՒ N զորամասի պահպանության տարածքում ինժեներական աշխատանքներ կատարելիս, ադրբեջանական զինված ուժերի զինծառայողների կողմից շրջափակվել և գերեվարվել է ՀՀ ԶՈՒ վեց զինծառայող։ Նրանք պայմանագրային զինծառայողներ են՝ Ա. Ն. Աբգարյանը, Ի. Ա. Սարգսյանը, Վ. Վ. Սարգսյանը, Բ. Ս. Օհանյանը, Ա. Գ. Բուդոյանը, Վ. Օ. Ռաֆայելյանը»,- տեղեկացրել է ՀՀ պաշտպանության նախարարությունը։

Արման Աբովյանի գնահատմամբ՝ ադրբեջանցիները բարբարոս են և օկուպանտ, պարզ չէ, թե մենք ինչի ենք սպասում:

«Իշխանությունները պետք է դադարեն բոլորի վրա իրենց մեղքը բարդեն ` ՀԱՊԿ-ի, Ռուսաստանի: Եթե դու չես պաշտպանվում, ապա ոչ ոք քո փոխարեն քեզ չի պաշտպանելու: Իսկ պաշտպանվելու դեպքում, քո գործընկերները կկանգնեն քո կողքին», - շեշտեց նա:

ԲՀԿ քարտուղարը նշեց, որ երեկ Փաշինյանը, փորձելով ստեղծված իրավիճակի համար ամբողջ մեղքը բարդել Ռուսաստանի ու ՀԱՊԿ-ի վրա, շարունակում է իր քաղաքականությունը։

«Այս իշխանությունը միշտ փնտրում է մեղավորներին, իրենց այսպես կոչված քաղաքականության շրջանակներում: Հիմա էլ մեղավոր են ՀԱՊԿ-ը ու Ռուսաստանը: Պարզապես ես չեմ կարողանում հասկանալ իրենց տրամաբանությունը: Եթե դու չես պաշտպանվում, որդեգրել ես «խաղաղության ուղի», ապա պետք է պատրաստ լինես պատերազմի», - նկատեց պատգամավորը՝ արձանագրելով, որ մեր գործողություններն ի սկզբանե սխալ էին: «Մեր գործողությունները պետք է լինեն իրավիճակին համարժեք»:

Հեղինքկ՝ Անի Մշեցյան

Աղբյուր` Փաստինֆո