Փաստ ինֆո

Գորիսի քաղաքապետ Առուշ Առուշանյանի գործով նախաքննության ավարտ է հայտարարվել։ Այս մասին «Փաստինֆո»-ի հետ զրույցում ասաց Առուշանյանի պաշտպան Արմեն Մելքոնյանը՝ նշելով, որ որոշ մեղադրանքներից նախաքննական մարմինը հրաժարվել է։

Ինչպես արդեն տեղեկացրել ենք՝ ընդդեմ Նիկոլ Փաշինյանի դեռեւս 2020 թվականի դեկտեմբեր ամսին Սյունիքի տարածքները ադրբեջանցիների հսկողությանը հանձնելու Նիկոլ Փաշինյանի գործողությունների դեմ իր անհամաձայնությունը բարձրաձայնելուց հետո քրեական հետապնդումներ սկսվեցին Գորիսի քաղաքապետ Առուշ Առուշանյանի նկատմամբ։ Քննչական կոմիտեն հայտարարեց տարբեր հոդվածներով նրան մեղադրանք առաջադրելու մասին։

Բացառությամբ հավաքներ կազմակերպելու փորձի վերաբերյալ քրեական գործի՝ մյուս դրվագներով քննություն արդեն տևական ժամանակ է, ինչ կատարվում էր, որոնց մասին ՔԿ-ն հիշեց 2020 թվականի դեկտեմբերին։ Որպես մեղադրյալ ներգրավելու մասին որոշման համաձայն՝ Ա.Առուշանյանն իր ընտանիքին պատկանող մեկ այլ ՍՊ ընկերությունում 2020թ. հունվար-փետրվար ամիսներին կատարված գույքագրմամբ արձանագրված շուրջ 33,000,000 ՀՀ դրամ պակասորդի վերաբերյալ պարզաբանումներ ստանալու և պատճառված վնասը հատուցելուն հարկադրելու նպատակով 2020թ. փետրվարին ընկերության պահեստ է կանչել ՍՊ ընկերության աշխատակցին և վերջինիս հետ հանդիպման ընթացքում ֆիզիկական բռնություն գործադրելով և բռնություն գործադրելու սպառնալիքով, որպես պատճառված ենթադրյալ վնասի դիմաց փոխհատուցման միջոց՝ աշխատակցից պահանջել է իրեն տրամադրել նրան պատկանող «Նիսսան պայտֆայնդեր» մակնիշի ավտոմեքենան, բանկում գրավադնել կնոջ հարազատներին պատկանող բնակարանը և ստացած վարկային միջոցները տրամադրել իրեն:

Առուշ Առուշանյանն այսօր հրավիրվել էր ՔԿ, որտեղ արդեն հայտնի է դարձել, որ քրեական գործով նախաքննության ավարտ է հայտարարվել։ Փաստաբան Արմեն Մելքոնյանը մեզ հետ զրույցում նշեց, որ քրեական գործը բաղկացած է 13 հատորից, տրամադրվել են նյութեր, որոնք ուսումնասիրելու համար ամիսներ են անհրաժեշտ, երկու-երեք ամիս անձին գաղտնալսել են և ժամանակ է անհրաժեշտ՝ նյութերին ծանոթանալու և համապատախան միջնորդությամբ հանդես գալու համար։ Գործի նյութերին ծանոթանալու համար պաշտպանության կողմը խնդրել է 25 օր ժամանակ՝ հաշվի առնելով գործի նյութերի ծավալը, սակայն դեռևս հստակ չէ, թե քանի օր ժամանակ է տրամադրվել։

Նշենք, որ Առուշանյանին առաջադրված մեղադրանքի ծավալը փոխվել է։ Վարույթ իրականացնող մարմինը որոշում է կայացրել՝ ՀՀ քրեական օրենսգրքի 225.1-րդ հոդվածով մեղադրանքը վերացնելու և ՀՀ քրեական օրենսգրքի 133-րդ հոդվածով քրեական հետապնդում չիրականացնելու մասին։ Ինչ վերաբերում է նախաքննության ընթացքում տեսաերիզների կրկնակի փորձաքննություն նշանակելու մասին պաշտպանության կողմից միջնորդությանը, փաստաբանը հայտնեց, որ փորձաքննությունը չի կատարվել։

Անդրադառնալով նախաքննության ընթացքում քրեական գործով քննիչի և ԲԴԽ նախագահի ժամանակավոր պաշտոնակատար Գագիկ Ջհանգիրյանի հանդիպումներին և հարցին, թե արդյոք այդ հիմքով քննիչին բացարկ հայտնել են՝ փաստաբանը նշեց, որ գործի նյութերին ծանոթանալուց հետո մի շարք հարցեր կբարձրացվեն, գուցե նաև՝ այդ հարցը։

Հեղինակ՝ Իզաբել Սահակյան

Աղբյուր` Փաստինֆո